මේ වන විට ශ්රී ලංකාව තුළ ජලභීතිකා මරණ 20ක් වාර්තා වී ඇති බවත්, අපගේ සමාජ වගකීම නිවැරදිව ඉටු කළේ නම් ඩෙංගු මරණ මෙන්ම ජලභීතිකා මරණත් වළක්වා ගැනීමට හැකිව තිබූ බවත් රාජ්ය පරිපාලන, පළාත් සභා සහ පළාත් පාලන අමාත්ය මහාචාර්ය චන්දන අබයරත්න මහතා පවසයි.
කොළඹ බණ්ඩාරනායක අනුස්මරණ සම්මන්ත්රණ ශාලාවේ පැවති ‘පේට් එක්ස්පෝ ශ්රී ලංකා 2026′ (Pet Expo Sri Lanka 2026) ප්රදර්ශනයේ සමාරම්භක අවස්ථාවට එක්වෙමින් අමාත්යවරයා මෙම අදහස් පළ කළේය. සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේද සහභාගීත්වයෙන් මෙම ප්රදර්ශනය පැවැත්විණි.
එහිදී වැඩිදුරටත් අදහස් දැක්වූ අමාත්යවරයා සඳහන් කළේ ජලභීතිකාව මුළුමනින්ම තුරන් කිරීමේ අභියෝගය දේශපාලන අධිකාරිය, වෛද්යවරුන් සහ අනෙකුත් වෘත්තිකයන් ඇතුළු සමස්ත ප්රජාවම එකතුවී භාරගත යුතු බවයි. ජලභීතිකා ප්රතිකාර සහ වැළැක්වීම් සඳහා රජයක් ලෙස දැවැන්ත මුදලක් යොදවන බව පෙන්වා දුන් ඒ මහතා, පුත්තලම දිස්ත්රික්කයෙන් පමණක් මරණ 4ක් වාර්තා වී ඇති බවද කියා සිටියේය. වගකීමෙන් යුතුව සුරතල් සතුන් ඇති කිරීමේ වැදගත්කම සහ මේ හරහා ජන ජීවිතවලට සිදුවන බලපෑම් අවම කර ගැනීම පිළිබඳවද අමාත්යවරයා මෙහිදී අවධාරණය කළේය.
