මෙරට ලැබෙන බදු ආදායම සහ විදේශ ප්රේෂණවලින් වැඩිම මුදලක් ගොවි ජනතාව වෙනුවෙන් වැය කරන බව කෘෂිකර්ම, පශු සම්පත්, ඉඩම් සහ වාරිමාර්ග අමාත්ය කේ.ඩී. ලාල්කාන්ත මහතා ප්රකාශ කළේය. අමාත්යවරයා මේ බව පැවසුවේ “වාරි මහිම අපේ උරුමය” ජාතික වැඩසටහනට සමගාමීව රුපියල් මිලියන 83.20ක වියදමින් මහමාන්කඩවල වැව් බැම්ම ප්රතිසංස්කරණය සහ ගේට්ටු සහිත වාන් නිර්මිතය ඉදිකිරීමේ කටයුතු ආරම්භ කරමිනි.
රටට බත සපයන ගොවියා මෙන්ම තේ කර්මාන්තයේ නිරත කුඩා තේ වතු හිමියන්ද ආර්ථිකයට වැදගත් බව පෙන්වා දුන් අමාත්යවරයා, වී මිල උච්චාවචනය වීම ගැටලුවක් බැවින් එය ස්ථාවරව පවත්වා ගැනීමට රජය උත්සාහ කරන බව සඳහන් කළේය. එබැවින් වී අලෙවි මණ්ඩලයේ ගබඩා විවෘත කළ අවස්ථාවේදී වී අස්වනු අලෙවි කරන ලෙසත්, වැඩි මිලක් අපේක්ෂාවෙන් නිවෙස්වල ගබඩා නොකරන ලෙසත් ඔහු ගොවීන්ගෙන් ඉල්ලා සිටියේය.
තවදුරටත් අදහස් දැක්වූ අමාත්යවරයා, ඉදිරියේදී පොහොර මිල අඩුවනු ඇතැයි බලාපොරොත්තු වන බවත්, නිෂ්පාදන පිරිවැය ඉහළ යාමට සාපේක්ෂව ගොවීන්ට සහන ලබා දීමට පියවර ගන්නා බවත් පැවසීය. එමෙන්ම පෞද්ගලික පොහොර සමාගම් රජයට ලබා දුන් සහයෝගය අගය කළ ඒ මහතා, රටේ කර්මාන්ත හෝ ඉන්ධන සැපයුම බිඳ වැටීමට ඉඩ නොතබා පවත්වාගෙන යාමට රජය සමත් වූ බවද වැඩිදුරටත් කියා සිටියේය.
