රට පුරා වකුගඩු ආශ්රිත රෝගවලින් පෙළෙන දහස් ගණන් රෝගීන්ට සහනයක් සැලසීම සහ සැත්කම් සඳහා පවතින රෝගීන් 5,000කට අධික පොරොත්තු ලේඛනය අවම කිරීමේ අරමුණින් මිරිගම මූලික රෝහල් පරිශ්රයේ අලුතින් ඉදිකළ ‘වකුගඩු ගල් ඉවත් කිරීමේ ප්රතිකාර මධ්යස්ථානය’ අද (12) විවෘත කෙරිණි.
සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතාගේ ප්රධානත්වයෙන් මෙම මධ්යස්ථානය විවෘත වූ අතර, දශක දෙකකට ආසන්න කාලයක් පැවති සෞඛ්ය අවශ්යතාවක් මේ හරහා ඉටු කෙරේ. සෞඛ්ය අමාත්යාංශයේ බෝ නොවන රෝග පිළිබඳ කාර්ය සාධක බලකායේ මැදිහත්වීමෙන් මාස තුනක් වැනි කෙටි කාලයක් තුළ මෙම ව්යාපෘතිය නිම කිරීමට හැකි විය.
ශ්රී ලංකාව පුරා මුත්රා රෝග විශේෂඥ ශල්ය ඒකක 30කට අධික ප්රමාණයක් ක්රියාත්මක වුවද, මෙහෙයුම් ශාලා සීමිත වීම සහ නවීන තාක්ෂණයට ප්රවේශ වීමේ අපහසුතා හේතුවෙන් රෝගීන්ට දිගු කාලයක් පොරොත්තු ලේඛනවල රැඳී සිටීමට සිදුව තිබේ. නව පහසුකම මගින් රටේ ඕනෑම ප්රදේශයක සිටින රෝගීන් මිරිගම රෝහලට රැගෙන විත්, විශේෂඥ වෛද්යවරුන් ලවා නවීන තාක්ෂණය භාවිතයෙන් සැත්කම් සිදු කිරීමට අවස්ථාව සැලසේ.
සමාරම්භක උත්සවයේදී අදහස් දැක්වූ අමාත්ය වෛද්ය නලින්ද ජයතිස්ස මහතා ප්රකාශ කළේ, නිසි සැලසුම්කරණයකින් තොරව ගොඩනැගිලි සහ වෛද්ය උපකරණ මිලදී ගැනීම නිසා මෙරට සෞඛ්ය පද්ධතිය තුළ නිසි ප්රයෝජනයක් නොලබන සම්පත් පවතින බවයි. පවතින සම්පත් සහ මානව බලශක්තිය උපරිම ලෙස කළමනාකරණය කිරීමේ වැදගත්කම ඔහු අවධාරණය කළේය.
