මොනරාගල දිස්ත්රික්කයේ වෘත්තීය පුහුණුව හැදෑරූ සිසුන්, වැඩ ලෝකයට ගැළපෙන නිපුණ ශිල්පීන් බවට පත් කරමින් ඔවුන් සවිබලගැන්වීමේ අරමුණින් සංවිධානය කළ ‘නිපුණත්වයෙන් වැඩ ලෝකයට’ වැඩසටහන පසුගියදා (23) මොනරාගල SOS වෘත්තීය පුහුණු ආයතනයේදී සාර්ථකව පැවැත්විණි.
මෙම වැඩසටහන සඳහා සිසුහු 140 දෙනෙක් පමණ සහභාගි වූහ. එහිදී වෘත්තීය ජීවිතය සාර්ථක කරගැනීම සඳහා අවශ්ය වැදගත් කරුණු රැසක් පිළිබඳව සිසුන් දැනුවත් කිරීම සිදු කෙරිණි.
වැඩසටහනේ ප්රධාන අවධානය යොමු වූ කරුණු
ජාතික වෘත්තීය සුදුසුකම් (NVQ) සහතිකය ලබා ගැනීමේ වැදගත්කම සහ දෙස් විදෙස් රැකියා අවස්ථා පිළිබඳව මෙහිදී සිසුන්ව පුළුල් ලෙස දැනුවත් කෙරිණි. එසේම, ස්වයං රැකියා සඳහා අවශ්ය අභිප්රේරණය ලබාදීම, වැඩ ලෝකයට ගැළපෙන හැසිරීම්, කුසලතා සහ ආකල්ප වර්ධනය කිරීම මෙන්ම අනාගත ජීවිත ඉලක්ක සපුරා ගැනීමට අවශ්ය මඟපෙන්වීම ද මෙහිදී සිදු විය. මීට අමතරව, NVQ 5 සහ 6 මට්ටම් සඳහා දිස්ත්රික්කයේ තරුණ ප්රජාව යොමු කිරීම සහ NVQ 7 මට්ටම දක්වා ගමන් කිරීමට අවශ්ය නිසි උපදෙස් ලබාදීම ද මෙම වැඩසටහනේ විශේෂත්වයකි.
සහභාගී වූ සම්භාවනීය අමුත්තන්
මෙම අවස්ථාව සඳහා මොනරාගල අතිරේක දිස්ත්රික් ලේකම් එම්.එම්. විජේනායක, සහකාර දිස්ත්රික් ලේකම් ඩී.ඩබ්. දහනායක, SOS වෘත්තීය පුහුණු ආයතනයේ සහකාර අධ්යක්ෂ හර්ෂණ විදුරංග සහ දිස්ත්රික් නිපුණතා සංවර්ධන නිලධාරි කේ.එම්. කුමාරතුංග ජයසිරි යන මහත්වරුන් ඇතුළු පිරිසක් එක්ව සිටියහ.
