පසුගිය මාසයේ පැවති මුල්ලිවයික්කාල් අනුස්මරණ උත්සවයකට සහභාගී වීම සඳහා ගමන් කරමින් සිටියදී රථවාහන නීති උල්ලංඝනය කළ යතුරුපැදිකරුවන් තිදෙනෙකුට මුලතිව් මහේස්ත්රාත් අධිකරණය විසින් දඩ මුදල් නියම කර තිබේ.
පොලිස් පරීක්ෂණවලට අනුව, සැකකරුවන් තිදෙනා මැයි 18 වන දින කිලිනොච්චි ප්රදේශයේ සිට මුල්ලිවයික්කාල් දෙසට යතුරුපැදිවලින් ගමන් කරමින් සිටියදී රථවාහන නීති උල්ලංඝනය කර ඇත. මේ සම්බන්ධයෙන් සිදුකළ විමර්ශනවලින් අනතුරුව පුදුකුඩිඉරිප්පු පොලිසිය විසින් මැයි 23 වන දින ඔවුන්ව අත්අඩංගුවට ගෙන මුලතිව් මහේස්ත්රාත් අධිකරණය වෙත ඉදිරිපත් කරන ලදී.
එදින රුපියල් 150,000 බැගින් වූ ශරීර ඇප තුනක් මත මුදාහැරුණු සැකකරුවන්, ජුනි 16 වන දින නඩුව නැවත කැඳවූ අවස්ථාවේදී තමන්ට එරෙහිව ගොනු කර තිබූ චෝදනා පිළිගත්තේය. ඒ අනුව, අධිකරණය විසින් ඔවුන් තිදෙනාට පිළිවෙළින් රුපියල් 11,500, 11,500 සහ 17,500ක දඩ මුදල් නියම කර පසුව නිදහස් කරන ලදී.
