මහා භාණ්ඩාගාරයේ සිදුවූ ඩොලර් මිලියන 2.5ක මුදල් අක්රමිකතාව සම්බන්ධයෙන් මියගිය නිලධාරියාගේ නමට හානි වන ලෙස අසත්ය ප්රකාශ සිදුකරන පුද්ගලයන්ට එරෙහිව නීතිමය පියවර ගැනීමට ඔහුගේ පවුලේ සාමාජිකයන් සූදානම් වන බව සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා ඊයේ (05) පාර්ලිමේන්තුවේදී පැවසීය.
මෙම මූල්ය වංචාව සම්බන්ධයෙන් විපක්ෂය එල්ල කරන චෝදනාවලට පිළිතුරු දෙමින් අමාත්යවරයා සඳහන් කළේ, අදාළ සිද්ධිය වාර්තා වූ වහාම විදේශ සම්පත් දෙපාර්තමේන්තුවේ අධ්යක්ෂ ජනරාල්වරයා පැමිණිලි කර විමර්ශන කමිටු පත් කළ බවයි. පැමිණිල්ල සිදුකළේ මියගිය නිලධාරියා බවට විපක්ෂය පතුරවන කතාව අසත්යයක් බවත්, මරණය සම්බන්ධයෙන් දේශපාලන වාසි තකා සැක සංකා මැවීමට ඔවුන් උත්සාහ කරන බවත් ඔහු අවධාරණය කළේය.
සයිබර් ආරක්ෂණය ශක්තිමත් කිරීමට රජය කටයුතු කරමින් සිටින බවත්, මියගිය නිලධාරියාගේ පවුලේ උදවිය විපක්ෂයේ ප්රකාශ නිසා දැඩි කම්පනයට පත්ව ඇති බවත් අමාත්යවරයා වැඩිදුරටත් සඳහන් කළේය. මුදල් අමාත්යාංශ ලේකම්වරයා පිළිබඳ පතුරවන අසත්ය තොරතුරු ද ඔහු මෙහිදී ප්රතික්ෂේප කළේය.
