දැන් පවතින්නේ පොකට්කාරයන්ගේ ආණ්ඩුවක් බවත්, මහ දවල් මුදල් අමාත්යාංශය කොල්ලකෑමට රජය කටයුතු කර ඇති බවත් ශ්රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්රී නාමල් රාජපක්ෂ මහතා පවසයි. අද (26) කොළඹදී මාධ්ය වෙත විශේෂ ප්රකාශයක් කරමින් මන්ත්රීවරයා මේ බව සඳහන් කළේය.
සැබෑ පොකට්කාරයා “මෙන්න හොරෙක්” යැයි කෑගසමින් ජනතාව නොමඟ යවා සොරකමේ යෙදෙන ආකාරයට වර්තමාන ආණ්ඩුව ද කටයුතු කරන බව ඔහු මෙහිදී උපමාවකින් පැහැදිලි කළේය. බලයට පත් වූ දා සිට කන්ටේනර් 323ක් අතුරුදහන් කිරීම, වරායෙන් මත්ද්රව්ය කන්ටේනර් පිට කිරීම සහ ගල් අඟුරු වංචාව වැනි දූෂණ රැසක් රජය විසින් සිදු කර ඇති බවට ද ඔහු චෝදනා කළේය.
විශේෂයෙන්ම මහා භාණ්ඩාගාරයේ ගිණුම්වලින් මුදල් අතුරුදහන් වීම සම්බන්ධයෙන් රජය වගකිව යුතු බවත්, ජනතාව නොමඟ යවමින් රජය දිගින් දිගටම මහා පරිමාණ වංචාවල නිරත වන බවත් මන්ත්රීවරයා වැඩිදුරටත් කියා සිටියේය.
