නාමල් රාජපක්ෂට ඉතා පැහැදිලිව පවසන්නේ අරගලයත් එක්ක ප්‍රශ්නයක් තියාගන්නා ලෙසත් අරගලය පාරට ආවේ ඔයාලාව එලවන්න යැයි අලුත් පරපුරේ ජගත් මනුවර්ණ මහතා පවසයි.

ඒ මහතා මේ බව පැවසුවේ ඒකාබද්ධ ජනතා ව්‍යාපාරයේ උද්ඝෝෂණ රැලිය ඊයේ (27) කොළඹදී අමතමිනි.

එහිදී වැඩිදුරටත් අදහස් පල කල ජගත් මනුවර්ණ මහතා ” මැර බලයට එරෙහි ජන බලය කියලා සනත් නිශාන්ත ඇතුළු පිරිස රැස්වීමක් කරනවා. ඒ වේදිකාව හදලා තිබෙන්නේ සනත් නිශාන්තගේ ගිනිගත් නිවස මත කියලා ෆේස්බුක් එකේ ලියලා තිබුණා. අපි උන්ට කියනවා අපි හැමෝම අද ඉන්නේ තොපි ගිනි තියපු රටේ කියලා. නාමල් රාජපක්ෂ කියනවා අරගලයත් එක්ක ප්‍රශ්නයක් නැහැ, අරගලකාරයොත් එක්ක ප්‍රශ්නයක් තියෙනවා කියලා. එහෙම නම් අරගලය කවුද දන්නේ නැහැ. එයා හිතන්නේ අරගලය කියන්නේ භූමිකම්පාවක්, ගංවතුරක් වගේ එකක් කියලා. අපි නාමල් රාජපක්ෂට ඉතා පැහැදිලිව කියනවා ඔයා අරගලයත් එක්ක ප්‍රශ්නයක් තියාගන්න කියලා. අරගලය පාරට ආවේ ඔයාලාව එලවන්න. ඔයාගෙ අප්පච්චි එලවන්න. ඔයාගෙ බාප්පලාව එලවන්න. ඒ නිසා අරගලයත් එක්ක ප්‍රශ්නයක් නැතිවෙන්න බැහැ. ඒ නිසා නාමල් රාජපක්ෂ අරගලයත් එක්ක ප්‍රශ්නයක් තියාගන්න කියලා අපි කියනවා. ඔයාට අරගලයත් එක්ක ප්‍රශ්නයක් නැත්නම් ඔයා නාමල් රාජපක්ෂ නොවෙයි. රනිල් වික්‍රමසිංහ හිතන්නේ අරගලය එයාලාගේ වැඩක් කියලා. හයිඩ්පිටියෙන් පටන් ගන්නේ අරගලයේ දෙවෙනි රැල්ල. එදා අපි නන්දසේන රාජපක්ෂට කීවා යන විදිහ ඔයා තීරණය කරන්න, යවන විදිහ අපි තීරණය කරන්නම් කියලා. අපි රනිල් වික්‍රමසිංහටත් ඒකම කියනවා. යන්න විදිහදක් ඔයා හොයාගන්න. යන්නේ නැත්නම් ගිහින් දාන්න අපි එනවා. මැයි 09වෙනිදා අරගලකාරයන්ට පහර දී අවතක්සේරු කිරීමේ ප්‍රතිඵල ජූලි 09 වැනිදා ඇතිවුණේ කොහොමද කියලා නැවත මතක් කර ගන්න කියලා. අරගලයේ නියම තක්සේරුව තව නොබෝ දවසකින් රනිල් රාජපක්ෂ ආණ්ඩුවට අපි පෙන්වනවා. විකෘති ආණ්ඩුව ගෙදර යන්න කියලා, දූෂිත පාලකයෝ රැල පුටුවලින් බැහැලා ජනවරමකට ඉඩක් දෙන්න කියන එක තේරෙන්නේ නැත්නම් ඒකට ගැලපෙන භාෂාව මොකක්ද කියලා අපි පෙන්වා දීලා තිබෙනවා. හෙට අනිද්දා අපි ඒ භාෂාව තෝරා ගන්නවා. ඒකට ලැහැස්ති වෙලා ඉන්න කියලා රනිල් රාජපක්ෂට අපි අවධාරණය කරනවා. යැයි ජගත් මනුවර්ණ මහතා වැඩිදුරටත් කියා සිටියේය.