එක්සත් රාජධානියට අයත් ප්රධාන රාජ්යයන් හතරෙන් තුනකම පාලන බලය ස්වාධීනත්වය අපේක්ෂා කරන ජාතිකවාදී පක්ෂ අතට පත්වීමේ තීරණාත්මක සන්ධිස්ථානයකට එළඹ තිබේ. පසුගිය සිකුරාදා පැවැති මැතිවරණ ප්රතිඵලවලට අනුව ස්කොට්ලන්තය, වේල්සය සහ උතුරු අයර්ලන්තය යන රාජ්යයන් තුනම බ්රිතාන්යයෙන් වෙන්වී ස්වාධීන පාලනයක් ඉල්ලා සිටින දේශපාලන බලවේගයන්ගේ ග්රහණයට නතු වී ඇත. මෙය දශක ගණනාවක් පුරා පැවති එක්සත් රාජධානියේ දේශපාලන ස්ථාවරත්වයට එල්ල වූ ප්රබල අභියෝගයක් ලෙස දේශපාලන විචාරකයෝ හඳුන්වති.
උතුරු අයර්ලන්තයේ සින් ෆේන් (Sinn Féin) පක්ෂයේ නායක මිෂෙල් ඕනීල් ප්රකාශ කරන්නේ ලන්ඩනයේ වෙස්ට්මිනිස්ටර් පාලනය අවසන් වීමේ කාලය එළඹ ඇති බවයි. ස්කොට්ලන්තයේ SNP පක්ෂය සිය බලය රැක ගැනීමට සමත් වූ අතර, වේල්සයේ ප්ලයිඩ් කම්රි (Plaid Cymru) පක්ෂය ඉතිහාසයේ ප්රථම වතාවට එරට ප්රධානතම දේශපාලන බලවේගය බවට පත්වෙමින් පවතී. බ්රිතාන්ය අග්රාමාත්ය කීර් ස්ටාමර්ගේ කම්කරු පක්ෂය සහ ප්රධාන විපක්ෂය වන කොන්සර්වේටිව් පක්ෂය කෙරෙහි මහජනතාව තුළ පවතින දැඩි අප්රසාදය මෙම ජාතිකවාදී පක්ෂවල නැගී සිටීමට ප්රධාන හේතුව වී තිබේ.
ආර්ථික පසුබෑම සහ ජීවන වියදම ඉහළ යාම හමුවේ මධ්යම රජය කෙරෙහි විශ්වාසය බිඳී ගිය ජනතාව මෙලෙස ප්රාදේශීය අනන්යතාවයන් ඉස්මතු කරන පක්ෂ වටා රොක් වී සිටිති. ස්වාධීනත්වය සඳහා වූ ජනමත විචාරණයක් ක්ෂණිකව පැවැත්වීමේ හැකියාවක් නැතත්, මෙම පක්ෂ තුනම එක්ව ‘සෙල්ටික් සන්ධානයක්’ (Celtic Alliance) ගොඩනගා ලන්ඩන් මධ්යම රජයට දැඩි බලපෑම් එල්ල කිරීමට සූදානම් වේ. බ්රිතාන්යයේ එක්සත්භාවය රැක ගැනීම සඳහා නව ව්යවස්ථාපිත එකඟතාවයකට එළඹීමට කාලය එළඹ ඇති බවත්, එසේ නොවුවහොත් ඉදිරි දශකය තුළ එක්සත් රාජධානිය බිඳී යාම වැළැක්විය නොහැකි වනු ඇති බවත් හිටපු අමාත්යවරුන් අනතුරු අඟවයි.
