ශ්රී ලංකා නාවික හමුදාව විසින් සංවිධානය කරන ලද 10 වැනි නාවික හමුදා විවෘත වෙඩි තැබීමේ තරගාවලිය (10th Navy Open Shooting Championship – 2026), 2026 ජූලි 18 වන දින ශ්රී ලංකා නාවික නෞකා ‘ගජබා’ ආයතනයේ පිහිටි කොමාන්ඩර් පරක්රම සමරවීර වෙඩි තැබීමේ ක්රීඩාංගණයේදී ඉතා උත්කර්ෂවත් ලෙස නිමාවට පත් විය.
ජූලි 01 වැනිදා සිට 12 වැනිදා දක්වා වැලිසර නාවික හමුදා වෙඩි තැබීමේ ක්රීඩාංගණයේදී පැවැති මෙම තරගාවලිය සඳහා ශ්රී ලංකා යුද්ධ හමුදාව, ශ්රී ලංකා නාවික හමුදාව, ශ්රී ලංකා ගුවන් හමුදාව සහ ශ්රී ලංකා පොලීසිය නියෝජනය කරමින් ක්රීඩක ක්රීඩිකාවන් 900කට අධික පිරිසක් සහභාගී වූහ. ඔවුන් අතරින් ක්රීඩක ක්රීඩිකාවන් 800කට අධික පිරිසක් නවක ක්රීඩක ක්රීඩිකාවන් වීම මෙම තරගාවලියේ විශේෂත්වයක් විය.
ත්රිවිධ හමුදාව සහ ශ්රී ලංකා පොලීසිය තුළ වෙඩි තැබීමේ ක්රීඩාව දියුණු කිරීම, නව දක්ෂතා හඳුනා ගැනීම සහ වෙඩි තැබීමේ ක්රීඩාවේ නිරත නවක ක්රීඩක ක්රීඩිකාවන්ට සිය දක්ෂතා උරගා බැලීමට මෙන්ම ඔවුන්ගේ තාක්ෂණික කුසලතා වැඩිදියුණු කිරීමට මෙම තරගාවලිය මගින් විශාල පිටුබලයක් ලැබිණි. තවද, ජාතික මට්ටමේ සූරයන් බිහි කිරීමේ අරමුණින් මෙම තරගාවලිය සුවිශේෂී වේදිකාවක් සැකසීය.
දැඩි තරගකාරීත්වයකින් පැවැති මෙම තරගාවලියේදී ශ්රී ලංකා නාවික හමුදා වෙඩි තැබීමේ සංචිතයේ ක්රීඩක ක්රීඩිකාවන් විශිෂ්ට දක්ෂතා දක්වමින් පදක්කම් රැසක් දිනා ගැනීමට සමත් වූ අතර, එය නාවික හමුදාවට විශාල ගෞරවයක් විය. ශ්රී ලංකාව තුළ වෙඩි තැබීමේ ක්රීඩාව ප්රවර්ධනය කිරීම සහ නව දක්ෂතා හඳුනා ගැනීම අරමුණු කරගනිමින් වාර්ෂිකව පවත්වනු ලබන මෙම තරගාවලිය, ක්රීඩක ක්රීඩිකාවන්ගේ ජාත්යන්තර මට්ටමේ කුසලතා වර්ධනය කරනු ලබන වැදගත් තරගාවලියක් ලෙස සැලකේ.
