දිවයින පුරා පවතින අයහපත් කාලගුණික තත්ත්වය සහ අධික වර්ෂාපතනය හේතුවෙන් දිස්ත්රික්ක කිහිපයකට පනවා තිබූ නායයෑම් අනතුරු ඇඟවීම් තවදුරටත් යාවත්කාලීන කිරීමට ජාතික ගොඩනැගිලි පර්යේෂණ සංවිධානය (NBRO) පියවර ගෙන තිබේ.
එම සංවිධානය නිවේදනයක් නිකුත් කරමින් සඳහන් කර ඇත්තේ අද (24) පෙරවරු 6.00 සිට හෙට (25) පෙරවරු 6.00 දක්වා ඉදිරි පැය 24ක කාලය සඳහා බලපැවැත්වෙන පරිදි මෙම අනතුරු ඇඟවීම් නිකුත් කළ බවයි.
අවධානයෙන් සහ විමසිලිමත් බවින් සිටිය යුතු ප්රදේශ:
කෑගල්ල දිස්ත්රික්කයේ දෙහිඕවිට, දැරණියගල, රුවන්වැල්ල, යටියන්තොට සහ රත්නපුර දිස්ත්රික්කයේ රත්නපුර, අයගම, කුරුවිට, ඇහැලියගොඩ යන ප්රාදේශීය ලේකම් කොට්ඨාස සඳහා මුලින්ම අවධානයෙන් සිටින ලෙස දන්වා තිබේ. මීට අමතරව කොළඹ දිස්ත්රික්කයේ සීතාවක, පාදුක්ක, ගම්පහ දිස්ත්රික්කයේ අත්තනගල්ල, කළුතර දිස්ත්රික්කයේ ඉංගිරිය, බුලත්සිංහල, හොරණ, පාලින්දනුවර, මතුගම, අගලවත්ත, කෑගල්ල දිස්ත්රික්කයේ බුලත්කොහුපිටිය, නුවරඑළිය දිස්ත්රික්කයේ අඹගමුව මෙන්ම රත්නපුර දිස්ත්රික්කයේ පැල්මඩුල්ල, කිරිඇල්ල, ඇලපාත, කලවාන සහ නිවිතිගල යන ප්රාදේශීය ලේකම් කොට්ඨාස සඳහා ද විමසිලිමත් බවින් පසුවන ලෙස දන්වා ඇත.
නායයෑම් ලක්ෂණ වන පොළොවේ ඇති වන පැලීම්, ගස් හෝ විදුලි කණු ඇලවීම් සහ හදිසියේ බොරදිය උල්පත් මතුවීම් පිළිබඳව දැඩි අවධානයෙන් පසුවන ලෙසත්, අවදානම් කලාපවල ජීවත්වන ජනතාව අවශ්ය වුවහොත් වහාම ආරක්ෂිත ස්ථාන කරා පියවර ගන්නා ලෙසත් ජාතික ගොඩනැගිලි පර්යේෂණ සංවිධානය මහජනතාවගෙන් ඉල්ලා සිටී.
