ලොව ප්රකට ආහාර සහ පානීය නිෂ්පාදන සමාගමක් වන Nestlé සමාගම සිය නව ගෝලීය සන්නිවේදන හා තාක්ෂණික මධ්යස්ථානයක් ඉන්දියාවේ හයිද්රාබාද්හි පිහිටුවීමට කටයුතු සූදානම් කර ඇති බව ජාත්යන්තර වාණිජ මාධ්ය වාර්තා සනාථ කරයි. ඉදිරි මාස කිහිපය ඇතුළත මෙහි මෙහෙයුම් කටයුතු නිල වශයෙන් ආරම්භ කිරීමට නියමිතව ඇති අතර, මෙමඟින් සමාගමේ ගෝලීය ව්යාපාරික ජාලය වඩාත් කාර්යක්ෂම කිරීමට අපේක්ෂා කෙරේ. ලොව ප්රමුඛතම තාක්ෂණික කේන්ද්රස්ථානයක් වන හයිද්රාබාද් නගරය ආශ්රිතව මෙම මධ්යස්ථානය ස්ථාපිත කිරීම මඟින් කලාපීය වශයෙන් නව රැකියා අවස්ථා රැසක් ද බිහිවනු ඇතැයි පැවසේ.
මෙම නව ගෝලීය මධ්යස්ථානය ප්රධාන වශයෙන් කෘතිම බුද්ධිය , දත්ත විශ්ලේෂණය, ඩිජිටල් පරිවර්තනය සහ සැපයුම් දාම නවෝත්පාදනයන් යන සුවිශේෂී ක්ෂේත්ර කෙරෙහි වැඩි අවධානයක් යොමු කරමින් ක්රියාත්මක වීමට නියමිතය. නෙස්ලේ සමාගමේ ගෝලීය මෙහෙයුම් ඩිජිටල්කරණය කිරීම සහ නවීන තාක්ෂණික උපක්රම ඔස්සේ පාරිභෝගික සේවාවන් තවදුරටත් පුළුල් කිරීම සඳහා මෙම තාක්ෂණික කේන්ද්රස්ථානය ප්රමුඛ කාර්යභාරයක් ඉටු කරනු ඇතැයි සමාගම් ප්රකාශකයෝ පෙන්වා දෙති. ලොව පුරා පවතින වෙළඳපොළ අවශ්යතා වඩාත් කඩිනමින් හඳුනා ගැනීමට මෙම දත්ත සහ තාක්ෂණික විශ්ලේෂණ මධ්යස්ථානය මඟින් ඉහළ සහයෝගයක් ලැබෙනු ඇත.
මෙම නව ආයෝජනයත් සමඟ දකුණු ආසියානු කලාපය තුළ ගෝලීය තාක්ෂණික හා මෙහෙයුම් සේවා සපයන ප්රධානතම කේන්ද්රස්ථානයක් ලෙස ඉන්දියාව සතු භූමිකාව තවදුරටත් ශක්තිමත් වන බව ආර්ථික විශ්ලේෂකයෝ පවසති. ප්රමුඛ පෙළේ බහුජාතික සමාගම් රැසක් සිය ගෝලීය තාක්ෂණික මධ්යස්ථාන ඉන්දියාව තුළ ස්ථාපිත කිරීමට යොමුව ඇති පසුබිමක, නෙස්ලේ සමාගමේ මෙම නවතම පියවර ගෝලීය ව්යාපාරික ක්ෂේත්රයේ දැඩි අවධානයට ලක්ව ඇති අතර ඉදිරි දිනවලදී මෙහි සමාරම්භක කටයුතු පිළිබඳ නිල තොරතුරු ප්රකාශයට පත් කිරීමට නියමිතය.
