උතුරු පළාත තුළ වෙසක් සැරසිලි කිරීම සහ දන්සල් පැවැත්වීම තහනම් කරමින් පළාත් ආණ්ඩුකාරවරයා විසින් නියෝගයක් පනවා ඇති බවට සමාජ මාධ්ය හා ඇතැම් මාධ්ය ඔස්සේ පැතිර යන වාර්තා සම්පූර්ණයෙන්ම අසත්ය බව සෞඛ්ය හා ජනමාධ්ය අමාත්ය, රජයේ ප්රකාශක වෛද්ය නලින්ද ජයතිස්ස මහතා අවධාරණය කරයි.
රජයේ ප්රවෘත්ති දෙපාර්තමේන්තුවේදී ඊයේ (26) පස්වරුවේ පැවති කැබිනට් තීරණ දැනුම්දීමේ මාධ්ය හමුවට එක්වෙමින් අමාත්යවරයා කියා සිටියේ, රටේ පවතින ජාතික සමගිය සහ සංහිඳියාව සිතාමතාම බිඳහෙළීමේ නින්දිත අරමුණින් යුතුව යම් කණ්ඩායමක් විසින් මෙම ව්යාජ පුවත නිර්මාණය කර ඇති බවයි. මේ සම්බන්ධයෙන් දැඩි පියවරක් ගනිමින් උතුරු පළාත් ආණ්ඩුකාර කාර්යාලය විසින් අපරාධ පරීක්ෂණ දෙපාර්තමේන්තුව (CID) වෙත විධිමත් පැමිණිල්ලක් ද ඉදිරිපත් කර තිබේ. වෙසක් උත්සවයේදී බෞද්ධ සංකේතවලට නිසි ගෞරවය ලැබෙන පරිදි සහ සෞඛ්යාරක්ෂිතව දන්සල් පවත්වන ලෙස උපදෙස් මාලාවක් පමණක් නිකුත් කර ඇති බවත්, ජාතික සමගියට බාධා වන අයුරින් කටකතා පතුරුවන්නන්ට එරෙහිව තදින්ම නීතිය ක්රියාත්මක කරන බවත් අමාත්යවරයා පැවසීය.
රුපියල ශක්තිමත් වීම සහ මුද්රණාල ගැටලුව:
මෙහිදී ආර්ථිකය පිළිබඳව අදහස් දැක්වූ අමාත්යවරයා, ගෝලීය අර්බුද හමුවේ රුපියල අවප්රමාණය වූ දිනවල රජයට දෝෂාරෝපණය කළ විපක්ෂය, වත්මන් සාර්ථක කළමනාකරණය හේතුවෙන් යළි රුපියල වේගයෙන් ශක්තිමත් වෙද්දී නිහඬ වී ඇතැයි විවේචනය කළේය. එමෙන්ම, වසර ගණනාවක් තිස්සේ පවතින රජයේ මුද්රණාලයේ වැටුප් හා අවිධිමත් දීමනා ගැටලුව ස්ථිරවම නිරාකරණය කිරීම සඳහා අග්රාමාත්යවරියගේ මූලිකත්වයෙන් යුත් විශේෂ කමිටුවක් වෙත අදාළ වාර්තා යොමු කර ඇති බවත්, භාණ්ඩාගාරයෙන් යැපෙන මුද්රණාලය ඉදිරියේදී ලාභ ලබන ආයතනයක් බවට පත්කිරීමට කටයුතු කරන බවත් වෛද්ය නලින්ද ජයතිස්ස මහතා වැඩිදුරටත් කියා සිටියේය.
