තලවකැලේ ප්රදේශයේ දෘෂ්ටි ආබාධිතයන්ට සහනදායී මිලට ඇස් කණ්ණාඩි ලබා දෙන බව පවසා රෝගීන්ගෙන් අත්තිකාරම් මුදල් අය කළ කණ්ඩායමක් කොටගල සෞඛ්ය වෛද්ය නිලධාරීවරයා විසින් අත්අඩංගුවට ගෙන තිබෙනවා. මෙම පිරිස විසින් නගරයේ දෘෂ්ටි ආබාධ සායනයක් පවත්වා රෝගීන්ට විවිධ කාච පෙන්වා ඒවා සකස් කර දීම සඳහා අත්තිකාරම් මුදල් ලබාගෙන ඇති බව කොටගල සෞඛ්ය වෛද්ය නිලධාරී කාර්යාලයේ පරිපාලන මහජන සෞඛ්ය පරීක්ෂක එස්. දේවන් මහතා පවසනවා.
බදුල්ල සහ වැලිමඩ ප්රදේශයේ පදිංචි මෙම සැකකරුවන් සතු ව රෝගීන්ගේ ඇස් පරීක්ෂා කිරීමට හෝ කාච ලබා දීමට කිසිදු සුදුසුකමක් හෝ නීත්යානුකූල අවසර පත්රයක් නොමැති බව තහවුරු වී තිබෙනවා. මීට පෙර දෘෂ්ටි විශේෂඥ වෛද්යවරයෙකු යටතේ සේවය කළ මොවුන්, එම වෛද්යවරයා සසුන්ගත වීමෙන් අනතුරුව මෙම ජාවාරම ආරම්භ කර ඇති බවයි අනාවරණය වී ඇත්තේ.
සිද්ධිය සම්බන්ධයෙන් අත්අඩංගුවට ගත් සැකකරුවන්ට එරෙහිව හැටන් මහේස්ත්රාත් අධිකරණය හමුවේ නීතිමය පියවර ගැනීමට සෞඛ්ය බලධාරීන් කටයුතු කරනවා. එසේම, ඉකුත් 24 වන දින පැවැති සායනයේදී රෝගීන්ගෙන් ලබා ගත් සියලුම අත්තිකාරම් මුදල් වහාම ආපසු ගෙවන ලෙසට කොටගල සෞඛ්ය වෛද්ය නිලධාරීවරයා ඔවුන්ට උපදෙස් ලබා දී තිබෙනවා.
මෙවැනි ව්යාජ සායනවලට හසු නොවී, ඕනෑම වෛද්ය සායනයකට සහභාගි වීමට පෙර එහි නීත්යානුකූලභාවය සහ පසුබිම පිළිබඳව විමසිලිමත් වන ලෙස සෞඛ්ය අංශ මහජනතාවගෙන් කාරුණිකව ඉල්ලා සිටිනවා.
