මැදපෙරදිග කලාපයේ පවතින දරුණු දේශපාලනික සහ යුදමය ආතතීන් හමුවේ ශ්රී ලංකාව ඇතුළු ආසියානු රටවල් බහුතරයක මුදල් ඒකක ඇමෙරිකානු ඩොලරයට සාපේක්ෂව සීඝ්රයෙන් පහත වැටෙමින් පවතින බව මූල්ය වෙළෙඳපොළ වාර්තා පෙන්වා දෙයි.
ආර්ථික විශ්ලේෂකයන්ට අනුව ආසියානු වෙළෙඳපොළ මෙලෙස පීඩාවට පත්වීමට ප්රධාන සාධක තුනක් බලපා ඇත. එනම්, මැදපෙරදිග අර්බුදය නිසා ගෝලීය බොරතෙල් මිල ඉහළ යාම, උද්ධමනය පාලනය කරමින් එක්සත් ජනපද ඩොලරය අධික ලෙස ශක්තිමත් වීම සහ ගෝලීය අවිනිශ්චිතතාව හේතුවෙන් ආයෝජකයන් ආසියානු කලාපයේ තිබූ තමන්ගේ විදේශ ප්රාග්ධනය සහ වත්කම් වේගයෙන් ආපසු හැරවීමයි.
මෙහිදී ශ්රී ලංකා රුපියල ඩොලරයට සාපේක්ෂව සියයට 4.5ත් 4.8ත් අතර ප්රතිශතයකින් පහත වැටී ඇත. පසුගිය මැයි 22 වැනිදා ඩොලරයේ අගය රුපියල් 354 දක්වා ඉහළ ගිය අතර, 23 වැනිදා එය සුළු වර්ධනයක් පෙන්වමින් රුපියල් 340 සීමාවට පැමිණ තිබේ. මේ අතර ඉන්දියානු රුපියල ද සියයට 6කින් පහත වැටී ඇති අතර මේ වන විට ඇමෙරිකානු ඩොලරයක් ඉන්දියානු රුපියල් 96.38ක් ලෙස සටහන් වේ. මෙම තත්ත්වය තවදුරටත් පහත වැටීම වැළැක්වීම සඳහා ඉන්දියානු සංචිත බැංකුව (RBI) සක්රීයව මැදිහත් වී සිටී.
ඉන්දුනීසියානු රුපියල සියයට 6කින් සහ පිලිපීන පෙසෝ අගය සියයට 11.3කින් කලාපයේ දුර්වලම මට්ටමට වැටී ඇති අතර, ඒවා ස්ථාවර කිරීමට මධ්යම බැංකුවලට පොලී අනුපාත ඉහළ දැමීමට සිදුව ඇත. මීට අමතරව තායි බාත් සියයට 3.57කින් ද, දකුණු කොරියානු වොන් සියයට 3.93කින් ද, ජපාන යෙන් සියයට 1.37කින් ද, තායිවාන ඩොලරය සියයට 0.96කින් සහ හොංකොං ඩොලරය සියයට 0.54කින් බැගින් අගයෙන් පහත වැටී තිබේ.
මෙම දරුණු ගෝලීය බලපෑම හමුවේ වුව ද චීනය, මැලේසියාව සහ සිංගප්පූරුව සාර්ථකව මුහුණ දෙමින් ඩොලරයට සාපේක්ෂව සිය මුදල් ඒකක ශක්තිමත් කරගෙන ඇත. ඒ අනුව චීන යුආනය සියයට 2.6කින් ද, මැලේසියානු රිගිට් සියයට 2.01කින් ද සහ සිංගප්පූරු ඩොලරය සියයට 0.37කින් ද අගයෙන් ඉහළ ගොස් තිබීම කැපී පෙනේ.
