මාර්ග නීති උල්ලංඝනය කිරීම් සම්බන්ධයෙන් පනවනු ලබන දඩ මුදල් GovPay පද්ධතිය හරහා එම ස්ථානයේදීම ඩිජිටල් ක්රමයට ගෙවීමට රියදුරන්ට පහසුකම් සලසා නොදෙන රථවාහන පොලිස් නිලධාරීන්ට එරෙහිව දැඩි විනයානුකූල පියවර ගන්නා බව ශ්රී ලංකා පොලිසිය දැඩිව අවධාරණය කරයි.
රථවාහන භාර නියෝජ්ය පොලිස්පති (DIG) ඩබ්ලිව්.පී.ජේ. සේනාධීර මහතා පෙන්වා දෙන්නේ රියදුරන් පත්වන අපහසුතාවන් මඟහරවා ගැනීමටත්, දඩ මුදල් පියවීමේදී සිදුවන කාලය සහ ආර්ථික හානිය අවම කිරීමටත් 2025 අප්රේල් මාසයේදී මෙම GovPay ගෙවීම් ක්රමය හඳුන්වා දුන් බවයි. පැරණි ක්රමය යටතේ දඩ මුදල් ගෙවීම සඳහා රියදුරන්ට තැපැල් කාර්යාල ඉදිරිපිට දිගු වේලාවක් රැඳී සිටීමට සිදුවීමෙන් විශාල අපහසුතාවකට මුහුණ දීමට සිදු වූ බවත්, මහජනතාවගේ වටිනා කාලය ඉතිරි කිරීම වෙනුවෙන්ම මෙම නව ඩිජිටල් ක්රමය ස්ථාපිත කළ බවත් හෙතෙම සඳහන් කළේය.
මෙම ව්යාපෘතියට අදාළව දිවයිනේ සියලුම පළාත් 09 ම ආවරණය වන පරිදි පොලිස් නිලධාරීන් දැනුවත් කිරීමේ වැඩසටහන් 2026 ජනවාරි මාසය වන විට අවසන් කර තිබේ. එමෙන්ම, මෙම ඩිජිටල් ගෙවීම් සේවාව සාර්ථකව ක්රියාත්මක කිරීම සඳහා ලංකාපේ (LankaPay) ආයතනය හරහා දිවයින පුරා පිහිටි පොලිස් ස්ථාන වෙත ස්මාර්ට් ජංගම දුරකථන 4,000කට ආසන්න ප්රමාණයක් ද බෙදාහැර ඇත. පොලිස් වාර්තාවලට අනුව මේ වන විට රථවාහන දඩ මුදල්වලින් 12%ක පමණ ප්රමාණයක් GovPay ක්රමය ඔස්සේ ගෙවනු ලබන අතර, නිලධාරීන්ගේ පැහැරහැරීම් හේතුවෙන් මහජනතාවට මෙම පහසුකම අහිමි වුවහොත් ඊට එරෙහිව තරාතිරම නොබලා පියවර ගන්නා බව පොලිසිය වැඩිදුරටත් කියා සිටියි.
