ජපානයේ නිසාන් (Nissan) සමාගම මුහුණ දී සිටින දැවැන්ත මූල්ය අර්බුදය හමුවේ, බ්රිතාන්යයේ සන්ඩර්ලන්ඩ් (Sunderland) හි පිහිටි සිය ප්රධාන කර්මාන්ත ශාලාව තුළ චීන ප්රතිවාදී සමාගම් වෙනුවෙන් මෝටර් රථ නිෂ්පාදනය කිරීමට සලකා බලමින් සිටින බව එම සමාගම තහවුරු කර තිබේ. මාර්තු මාසයෙන් අවසන් වූ මූල්ය වර්ෂය සඳහා යෙන් බිලියන 533ක (පවුම් බිලියන 2.5ක) ශුද්ධ පාඩුවක් වාර්තා කිරීමත් සමඟ, පිරිවැය කපා හැරීමට සහ ලාභදායී මට්ටමකට පැමිණීමට නිසාන් සමාගම මෙවැනි විකල්ප කෙරෙහි අවධානය යොමු කර ඇත.
තමන්ගේම වාහන සඳහා පවතින ඉල්ලුම අඩුවීම හේතුවෙන් සන්ඩර්ලන්ඩ් කර්මාන්ත ශාලාවේ නිෂ්පාදන මාර්ග දෙකෙන් එකක් වසා දැමීමට පසුගිය සතියේ තීරණය විය. එහි පවතින නිෂ්පාදන ධාරිතාවයෙන් නිසි ප්රයෝජනයක් ගැනීමට සහ 6,000ක් පමණ වන සේවක පිරිසගේ රැකියා සුරක්ෂිත කිරීම සඳහා බාහිර පාර්ශවයන් සමඟ එක්ව කටයුතු කිරීමේ අවශ්යතාවය නිසාන් සමාගමේ ප්රධාන විධායක නිලධාරී අයිවන් එස්පිනෝසා පෙන්වා දෙයි. මේ සම්බන්ධයෙන් චීනයේ චෙරි (Chery) සමාගම සමඟ සාකච්ඡා පවත්වා ඇති අතර, එම සමාගම සිය Chery, Jaecoo සහ Omoda යන සන්නාමයන් හරහා බ්රිතාන්ය සහ යුරෝපීය වෙළඳපොළට පිවිසීමට උත්සාහ කරමින් සිටියි.
යුරෝපීය වෙළඳපොළ තුළ චීන මෝටර් රථ සඳහා පවතින ඉල්ලුම ඉහළ යාම හමුවේ නිසාන් සමාගම පමණක් නොව ෆෝඩ් (Ford) සහ ස්ටෙලන්ටිස් (Stellantis) වැනි සමාගම් ද සිය භාවිතයට නොගන්නා කර්මාන්ත ශාලා තුළ චීන වාහන නිෂ්පාදනය කිරීමට ගීලි (Geely) සහ ලීප්මෝටර් (Leapmotor) වැනි සමාගම් සමඟ සාකච්ඡා පවත්වයි. එසේම ලොව විශාලතම විදුලි මෝටර් රථ නිෂ්පාදකයා වන BYD සමාගම ද යුරෝපයේ අඩුවෙන් ප්රයෝජනයට ගන්නා කර්මාන්ත ශාලා පවරා ගැනීම කෙරෙහි අවධානය යොමු කර තිබේ. ඇමරිකා එක්සත් ජනපදය විසින් පනවන ලද ආනයන බදු සහ චීන වෙළඳපොළ තුළ පවතින දැඩි තරඟකාරිත්වය නිසාන් සමාගමේ ආදායමට දැඩි ලෙස බලපා ඇති අතර, යුරෝපය පුරා සේවකයින් 900ක් පමණ ඉවත් කිරීමට ද එම සමාගම තීරණය කර ඇත.
