පාර්ලිමේන්තු මන්ත්රීවරුන්ට තම ප්රදේශයේ පාසල්වලට ගොස් එහි කටයුතු නිරීක්ෂණය කිරීමට හෝ උත්සව සඳහා සහභාගී වීමට කිසිදු තහනමක් පනවා නොමැති බව අග්රාමාත්ය හරිනි අමරසූරිය මහත්මිය පාර්ලිමේන්තුවේදී අවධාරණය කළාය. ඇය මේ බව සඳහන් කළේ මන්ත්රී හේෂා විතානගේ මහතා යොමු කළ ප්රශ්නයකට පිළිතුරු ලබා දෙමිනි.
මෙහිදී මන්ත්රීවරයා ප්රශ්න කළේ රජය විසින් පාසල් තුළ දේශපාලන කටයුතු සීමා කිරීමට පියවර ගෙන තිබියදී, මන්ත්රීවරියක් විසින් පාසල් වැසිකිළියක් සඳහා මුල්ගල තැබීමේ උත්සවයකට තූර්ය වාදක කණ්ඩායම් යොදා ගනිමින් සහභාගී වීම රජයේ ප්රතිපත්තියට අනුකූලද යන්නයි.
ඊට පිළිතුරු දෙමින් අග්රාමාත්යවරිය පැහැදිලි කළේ, රජයේ ප්රතිපත්තිය වන්නේ පාසල් දරුවන් හෝ පාසල් උත්සව දේශපාලන අරමුණු සඳහා භාවිත කිරීම වැළැක්වීම බවයි. පාසල් උත්සව දේශපාලන වේදිකා බවට පත් කිරීමට එදත් අදත් තමන් විරුද්ධ බවත්, දරුවන් දේශපාලන කටයුතු සඳහා භාවිත කිරීම කිසිසේත්ම අනුමත නොකරන බවත් ඇය අවධාරණය කළාය.
කෙසේ වෙතත්, ප්රදේශයේ නියෝජිතයෙකු ලෙස පාසලක කටයුතු සොයා බැලීමට හෝ උත්සවයකට සහභාගී වීමට මන්ත්රීවරුන්ට ඇති අයිතිය රජය විසින් අහෝසි කර නොමැති බවත්, රජය විරුද්ධ වන්නේ පාසල් පද්ධතිය දේශපාලනික අරමුණු සඳහා මෙහෙයවීමට පමණක් බවත් අග්රාමාත්යවරිය වැඩිදුරටත් පැහැදිලි කළාය.
