නොරොච්චෝල බලාගාරය වෙත රැගෙන ආ බාල ප්රමිතියෙන් යුත් ගල් අඟුරු නැවක් බලහත්කාරයෙන් ගොඩබෑමේ කටයුතු ආරම්භ කර ඇති බව ‘ෆ්රී ලෝයස්’ (Free Lawyers) සංවිධානය මාධ්ය නිවේදනයක් නිකුත් කරමින් චෝදනා කරයි. Taranjot Resource (Pvt) Ltd සමාගම විසින් සපයන ලද මෙට්රික් ටොන් 59,766ක ගල් අඟුරු රැගත් ‘MV JOSCO YONGZHOU’ නමැති මෙම නෞකාවට, පරීක්ෂා කිරීමෙන් විනාඩි 30ක් වැනි කෙටි කාලයක් තුළ ගොඩබෑමේ අනුමැතිය ලබා දීම දැඩි සැකයට තුඩු දෙන්නක් බව එම සංවිධානය පෙන්වා දෙයි.
Bureau Veritas Solutions South Africa ආයතනය විසින් නිකුත් කළ වාර්තාවට අනුව, මෙම ගල් අඟුරු තොගය සම්පූර්ණයෙන්ම ප්රතික්ෂේප කළ යුතු මට්ටමක පවතින බව නීතිඥවරුන් පවසයි. ලංකා ගල් අඟුරු සමාගමේ ටෙන්ඩර් කොන්දේසිවලට අනුව ගල් අඟුරුවල අඩංගු විය හැකි උපරිම අළු ප්රතිශතය 16ක් වුවද, මෙම තොගයේ අළු ප්රතිශතය 16.8ක් ලෙස වාර්තා වී ඇත. ටෙන්ඩර් ලියවිල්ල අනුව මෙවැනි තොගයක් දඩ මුදලක් අය කර හෝ මිලදී ගැනීමට රජයට නෛතික හැකියාවක් නොමැති බව ඔවුන් අවධාරණය කරයි.
ප්රමිතියෙන් තොර නිෂ්පාදනයක් වෙනුවෙන් රාජ්ය මුදල් වැය කිරීම 2023 අංක 9 දරණ දූෂණ විරෝධී පනත යටතේ සාපරාධී වරදක් බවත්, මෙම ක්රියාවලිය පිටුපස බරපතල ගල් අඟුරු වංචාවක් සිදුව ඇති බවත් එම සංවිධානය පවසයි. එබැවින්, මෙම ගල් අඟුරු තොගය ගොඩබෑම අත්හිටුවා, ලංකා ගල් අඟුරු සමාගම, විගණකාධිපති කාර්යාලය සහ තාක්ෂණික කමිටු මගින් වහාම ස්වාධීන පරීක්ෂණයක් සිදු කරන ලෙස නීතිඥ අතුල ද සිල්වා සහ නීතිඥ පියල් දර්ශන ගුරුගේ යන මහත්වරුන් බලධාරීන්ගෙන් ඉල්ලා සිටිති.
