දිට්වා සුළි කුණාටුව හේතුවෙන් නුවරඑළිය ප්රදේශයේ අවතැන් වූ පවුල් 35ක් සඳහා නුවරඑළිය සිනෙසිටා ක්රීඩාංගණයේ භාවිතයට නොගන්නා එක් පසක තාවකාලික නිවාස ඉදිකිරීමේ කටයුතු මේ වන විට ආරම්භ කර ඇති බව නුවරඑළිය දිස්ත්රික් ලේකම් තුෂාරි තෙන්නකෝන් මහත්මිය පවසයි. මෙම ඉදිකිරීම් සම්බන්ධයෙන් සමාජ මාධ්යවල පළවන අසත්ය ප්රචාර ප්රතික්ෂේප කරන ඇය, ඉන් ක්රීඩාංගණයට කිසිදු හානියක් සිදු නොවන බව සහතික කරයි.
සමස්ත දිස්ත්රික්කය තුළ ආපදාවට ලක්වූ පවුල් 2,500ක් පමණ නැවත පදිංචි කිරීමට පියවර ගනිමින් සිටින අතර, ඉන් වැඩි පිරිසක් කුලී නිවාසවල සහ ඥාති නිවාසවල පදිංචි කරවා තිබේ. කෙසේ වෙතත්, සංචාරක කලාපයක් වීම හේතුවෙන් නුවරඑළියේ කුලී පදනම මත නිවාස සොයාගැනීමේ අපහසුතාවක් පවතින බැවින්, සිනෙසිටා ගෘහස්ථ ක්රීඩාංගණයේ තාවකාලිකව රැඳී සිටින පවුල් 35 සඳහා මෙම වැඩපිළිවෙළ ක්රියාත්මක කෙරේ.
මෙම නිවාස ඉදිකිරීම සඳහා IOM, UNICEF සහ නාවික හමුදාවේ සහාය ලැබී ඇති අතර, සති දෙකක් වැනි කෙටි කාලයක් තුළ එම පවුල්වලට පදිංචි වීමට අවස්ථාව ලබාදීමට අපේක්ෂා කෙරේ. දීර්ඝකාලීන විසඳුමක් ලෙස මෙම පවුල්වලට ස්ථිර නිවාස ලබාදීමට කටයුතු කරමින් පවතින බව ද දිස්ත්රික් ලේකම්වරිය වැඩිදුරටත් සඳහන් කළාය.
නුවරඑළිය ප්රාදේශීය ලේකම් ඩී.ඒ.පී. දනන්සූරිය මහතා මේ සම්බන්ධයෙන් අදහස් දක්වමින් සඳහන් කළේ, අදාළ අවතැන්වූවන් සඳහා නානුඔය ප්රදේශයේ අක්කර 16ක ඉඩමක් හඳුනාගෙන ඇති බවයි. වසර හතක සිට පැවති ඉඩම් ගැටලුව විසඳා ගනිමින් එම භූමියේ මිනුම් කටයුතු මේ වන විට මිනින්දෝරු දෙපාර්තමේන්තුව සමඟ සිදුකරමින් පවතින අතර, ස්ථිර නිවාස ඉදිකිරීමෙන් අනතුරුව ඔවුන්ව එම ඉඩමට රැගෙන යාමට කටයුතු කරන බව ඔහු පැවසීය.
