නුවරඑළිය නගරයේ පිහිටි ලෝක ප්රකට ඓතිහාසික තැපැල් කාර්යාල ගොඩනැගිල්ලේ සවිකර තිබූ, ඉහළ පෞරාණික වටිනාකමකින් යුත් අකුණු සන්නායකය සොරකම් කිරීමේ සිද්ධියක් සම්බන්ධයෙන් නුවරඑළිය පොලිසිය මඟින් පුළුල් විමර්ශනයක් ආරම්භ කර තිබේ. මෙම විශේෂ මෙහෙයුම නුවරඑළිය කොට්ඨාසභාර ජ්යෙෂ්ඨ පොලිස් අධිකාරී සමරකෝන් බණ්ඩාර මහතාගේ සෘජු අධීක්ෂණය යටතේ, සහකාර පොලිස් අධිකාරී චන්දන බස්නායක ඇතුළු විශේෂ පොලිස් කණ්ඩායමක් විසින් ක්රියාත්මක කරනු ලබයි.
මෙම සොරකම මුලින්ම අනාවරණය වී ඇත්තේ තැපැල් කාර්යාල ගොඩනැගිල්ලේ ප්රතිසංස්කරණ කටයුතු සඳහා පැමිණි නිලධාරීන්ටය. එහිදී අකුණු සන්නායකයේ සිට පොළොව දක්වා ඇද තිබූ තඹ සහිත වටිනා යකඩ පට්ටම කිසියම් පිරිසක් විසින් කඩා දමා ඇති බව ඔවුන් නිරීක්ෂණය කර තිබේ. මේ පිළිබඳව වහාම ඉහළ බලධාරීන් දැනුවත් කිරීමෙන් පසු, මධ්යම පළාත් පුරාවිද්යා කොමසාරිස්වරයා විසින් අප්රේල් 29 වැනිදා නුවරඑළිය පොලිසිය වෙත නිල ලිඛිත පැමිණිල්ලක් ඉදිරිපත් කරමින් විධිමත් පරීක්ෂණයක් පවත්වන ලෙස ඉල්ලා ඇත.
පොලිස් පරීක්ෂණවලදී වැඩිදුරටත් හෙළි වී ඇත්තේ මෙම පෞරාණික අකුණු සන්නායකය කෙරෙහි මීට වසර ගණනාවකට පෙර සිටම විවිධ ජාවාරම්කරුවන්ගේ සහ බාහිර පුද්ගලයන්ගේ ඇස යොමුව තිබූ බවයි. මීට පෙරද පිටතින් පැමිණි සැකකටයුතු පුද්ගලයන් කිහිප දෙනෙකු මෙම අකුණු සන්නායකය පිළිබඳව සහ එහි අන්තර්ගත ලෝහ වර්ග පිළිබඳව තොරතුරු විමසා තිබීම හේතුවෙන්, 2014 නොවැම්බර් 06 වැනිදා එවකට සිටි තැපැල් ස්ථානාධිපතිවරයා විසින් ද පොලිසියට පැමිණිල්ලක් සිදු කර තිබූ බව අනාවරණය වී තිබේ. ඓතිහාසික උරුමයක් සොරකම් කළ සැකකරුවන් කොටු කරගැනීම සඳහා පොලිසිය විවිධ අංශ ඔස්සේ පරීක්ෂණ පවත්වයි.
