ලෝක වෙළෙඳපොළේ බොරතෙල් මිල යළිත් බැරලයක් ඩොලර් 100 ඉක්මවා ඉහළ යාමත් සමඟ ඉන්දීය රුපියලේ අගය අද (23) දිනයේ තවදුරටත් පහත වැටෙනු ඇතැයි අපේක්ෂා කෙරේ. ඒ අනුව ඇමෙරිකානු ඩොලරයට සාපේක්ෂව ඉන්දීය රුපියලේ අගය 94 සීමාව ඉක්මවා දුර්වල විය හැකි බව මූල්ය විශ්ලේෂකයෝ පෙන්වා දෙති. පසුගිය සතිය තුළ පමණක් ඉන්දීය රුපියලේ අගය සියයට 1කට ආසන්න ප්රමාණයකින් පහත වැටී ඇති අතර, මීට පෙර ඉන්දීය මහ බැංකුව (RBI) ගනු ලැබූ ආරක්ෂිත පියවර හේතුවෙන් රුපියල ලැබූ තාවකාලික ස්ථාවරත්වය දැන් අවසන් වෙමින් පවතින බව වෙළෙඳපොළ දත්ත සනාථ කරයි.
අද දින වෙළෙඳපොළ ආරම්භයේදීම රුපියලේ අගය ඩොලරයට සාපේක්ෂව 93.92 ත් 93.98 ත් අතර අගයක පවතිනු ඇතැයි වෙළෙඳුන් පුරෝකථනය කරන අතර, තෙල් මිල ඉහළ යාම ඉන්දියාව වැනි ආනයන මත යැපෙන රටක මූල්ය ස්ථාවරත්වයට එල්ල කරන දැඩි පීඩනය මෙහිදී කැපී පෙනේ. ඛනිජ තෙල් මිල ඉහළ යාම හේතුවෙන් ඇතිවන උද්ධමනකාරී පීඩනය සහ විදේශ විනිමය ගලායාම සීමා වීම රුපියලේ අගය තවදුරටත් පහත හෙළීමට හේතු වී තිබේ.
