ඉරානය සහ ඇමරිකානු-ඊශ්රායල හවුල්කාරිත්වය අතර පවතින යුදමය වාතාවරණය දිගු කාලයක් පැවතුණහොත්, යුක්රේනයට ඇමරිකාවෙන් ලැබෙන මිසයිල නාශක පද්ධති ලබාගැනීමේදී දැඩි අවදානමකට මුහුණ දීමට සිදුවනු ඇති බව යුක්රේන ජනාධිපති වොලොඩිමියර් සෙලෙන්ස්කි මහතා පවසයි. සී.එන්.එන් (CNN) පුවත් සේවය සමඟ පැවැති සම්මුඛ සාකච්ඡාවකදී ඔහු මේ බව සඳහන් කළේය.
ඇමරිකානු නිෂ්පාදන ධාරිතාව සීමිත බැවින් යුක්රේනයට මෙතෙක් ලැබී ඇත්තේ මිසයිල නාශක පද්ධති සීමිත ප්රමාණයක් පමණි. මැදපෙරදිග සහ ඉරානය කේන්ද්ර කරගනිමින් පවතින විශාල යුදමය අභියෝගය හමුවේ, යුක්රේනයට වෙන් කර ඇති ආයුධ පැකේජ ඉදිරියේදී වෙනත් අවශ්යතා සඳහා යොමු වීමේ අවදානමක් පවතී. නේටෝ (NATO) රටවල් හරහා ක්රියාත්මක වන PURL වැඩසටහන යටතේ යුක්රේනයට ‘පේට්රියට්’ (Patriot) වැනි මිසයිල නාශක පද්ධති මිලදී ගැනීමට හැකි වුවද, ඉල්ලුම ඉහළ යාම සැපයුමට බාධාවක් විය හැකි බව ඔහු පෙන්වා දෙයි.
යුක්රේන ජනාධිපතිවරයා වැඩිදුරටත් සඳහන් කළේ මෙතෙක් බුද්ධි තොරතුරු සැපයීමේදී හෝ ආයුධ සැපයුමේදී විශාල බාධාවක් සිදු නොවූවත්, ඉරාන අර්බුදය දිගු වීම යුක්රේනයේ ආරක්ෂාවට සෘජු බලපෑමක් එල්ල කරන බවයි.
