යාපනය, පලාලි නැගෙනහිර ප්රදේශයේ අධි ආරක්ෂිත කලාපය තුළ පිහිටි ජනතාවට අයත් ඉඩම් කඩිනමින් නිදහස් කර දීමටත්, එම කලාපයේ පිහිටා ඇති සියලුම ආගමික ස්ථාන මුදා හැරීමටත් ආරක්ෂක මණ්ඩලය සමඟ ඉදිරියේදී සාකච්ඡා කරන බව නියෝජ්ය ආරක්ෂක අමාත්ය අරුණ ජයසේකර මහතා යාපනයේදී ප්රකාශ කළේය.
ඊයේ (26) යාපනය ප්රදේශයේ විශේෂ නිල සංචාරයක නිරත වූ නියෝජ්ය අමාත්යවරයා පලාලි ප්රදේශයේ වත්මන් තත්ත්වය නිරීක්ෂණය කිරීමට එක් විය. එහිදී එම ස්ථානයට පැමිණි ධීවර අමාත්ය රාමලිංගම් චන්ද්රසේකරන් මහතා සහ උතුරු පළාත් ආණ්ඩුකාර නාගලිංගම් වේදනායගම් මහතා, මුල් පදිංචිකරුවන්ට ඔවුන්ගේ ඉඩම් ආපසු ලබාදීමේ පවතින දැඩි අවශ්යතාවය නියෝජ්ය අමාත්යවරයා වෙත පැහැදිලි කර දෙන ලදී.
1986 සිට අහිමි වූ ඉඩම්වලට වන්දි:
පලාලි අධි ආරක්ෂිත කලාපය පිහිටුවීම වෙනුවෙන් ජනතාවගෙන් අත්පත් කරගන්නා ලද ඉඩම් සහ නිවාස සඳහා 1986 වසරේ සිට නිසි පරිදි වන්දි මුදල් ලබාදීමේ අවශ්යතාවය ද මෙහිදී උතුරු පළාත් බලධාරීන් විසින් පෙන්වා දෙනු ලැබීය. ඒ පිළිබඳව අවධානය යොමු කළ නියෝජ්ය ආරක්ෂක අමාත්යවරයා, ආරක්ෂක අංශවල ඉහළ පෙළේ නිලධාරීන් සමඟ මේ සම්බන්ධයෙන් කඩිනමින් සාකච්ඡා කොට වහාම සාධාරණ තීන්දුවක් ලබා දෙන බවට පොරොන්දු විය.
මේ පිළිබඳව අදහස් දැක්වූ ධීවර අමාත්ය රාමලිංගම් චන්ද්රසේකරන් මහතා කියා සිටියේ, පලාලි අධි ආරක්ෂිත කලාපයේ ඇති සාමාන්ය ජනතාවගේ ඉඩම් පියවරෙන් පියවර නිදහස් කිරීමට ජනාධිපතිවරයා මීට පෙර එකඟතාවය පළ කර තිබූ බවයි. එහි සාධනීය ප්රතිඵලයක් ලෙස මේ වන විට අදාළ ඉඩම් හඳුනාගැනීමේ මූලික කටයුතු ප්රායෝගිකව ආරම්භ කර ඇති බව ද අමාත්යවරයා වැඩිදුරටත් සඳහන් කළේය.
