බදුල්ල දිස්ත්රික්කයේ ග්රාමීය සංචාරක ක්ෂේත්රය නව මාවතකට යොමු කිරීමේ තවත් එක් සුවිශේෂී පියවරක් ලෙස, පස්සර බ්ලානි වත්ත රජයේ ඉඩම කේන්ද්ර කරගනිමින් විශේෂ සංචාරක ව්යාපෘතියක් ක්රියාත්මක කිරීමට යෝජනා වී තිබේ. ප්රදේශයේ ජනතාවගේ ආර්ථික මට්ටම ඉහළ නැංවීම සහ පස්සර සංචාරක කර්මාන්තයේ නව ආකර්ෂණීය ගමනාන්තයක් බවට පත්කිරීමේ අරමුණින් මෙම ව්යාපෘතිය සකස් කර ඇත.
මෙම යෝජිත ව්යාපෘති භූමියේ ප්රායෝගික හැකියාවන් සහ ක්ෂේත්ර තත්ත්වය පිළිබඳව සොයා බැලීම සඳහා සංචාරක නියෝජ්ය අමාත්යවරයා, බදුල්ල දිස්ත්රික් පාර්ලිමේන්තු මන්ත්රී කිට්නන් සෙල්වරාජ් මහතා සහ පස්සර ප්රාදේශීය සභාවේ සභාපතිතුමා ඇතුළු නියෝජිත පිරිසක් විශේෂ ක්ෂේත්ර නිරීක්ෂණ චාරිකාවක නිරත වූහ. නමුණුකුල කඳු පන්තියට සහ පස්සර නගරයට අභිමුඛව පිහිටි මෙම මනරම් භූමිය ස්වාභාවික පරිසර සෞන්දර්යයෙන් පිරිපූර්ණ වන අතර, ආසන්නයේ පිහිටි සපුරොද මැණික් ඉල්ලම් සහ මැණික් ගරන ස්ථාන කේන්ද්ර කරගනිමින් විශේෂ සංචාරක ව්යාපෘති වාර්තාවක්ද මේ වන විට සකස් කර ඇත.
මෙම ව්යාපෘතිය යටතේ විශේෂයෙන්ම ‘මැණික් ගම්මානයක්’ (Gem Village) සහ ‘මැණික් කෞතුකාගාරයක්’ (Gem Museum) ස්ථාපිත කිරීමට නියමිතය. ශ්රී ලංකාවේ මැණික් කර්මාන්තයේ පාරම්පරික උරුමය, කැණීම් තාක්ෂණය සහ මැණික් ඔපදැමීමේ කලාත්මක හැකියාවන් දෙස් විදෙස් සංචාරකයින්ට එකම ස්ථානයකින් සජීවීව අත්විඳිය හැකි අද්විතීය අත්දැකීම් සහිත සංචාරක ගමනාන්තයක් (Experiential Tourism Destination) ලෙස මෙය සංවර්ධනය කෙරේ. දැනට ඇල්ල සංචාරක කලාපයට පැමිණෙන සංචාරකයින් ඇල්ල – නමුණුකුල මාර්ගය ඔස්සේ පස්සර වෙත ආකර්ෂණය කරගැනීමටත්, ප්රදේශයේ ජනතාවට නව සෘජු හා වක්ර රැකියා අවස්ථා උදාකර දීමටත් මෙයින් අපේක්ෂා කෙරේ.
