ශ්රී ලංකාවේ ඩිජිටල් ආර්ථිකය නව මාවතකට යොමු කරමින් මෙරට තුළ PayPal සේවා පහසුකම් පුළුල් කිරීම නිල වශයෙන් ප්රකාශයට පත් කිරීම ඉකුත් 16 වැනිදා කොළඹ ගෝල්ෆේස් හෝටලයේදී (Galle Face Hotel) සිදු කෙරිණි. මෙම ඓතිහාසික අවස්ථාවට එක්වූ අග්රාමාත්ය ආචාර්ය හරිනි අමරසූරිය මෙණෙවිය කියා සිටියේ, වත්මන් රජයේ ආර්ථික වර්ධන සැලැස්ම සාධාරණත්වය, විනිවිදභාවය සහ වගවීම යන මූලික ප්රතිපත්ති මත ගොඩනැඟී ඇති අතර මෙම ඩිජිටල් සහයෝගීතාව රටට විශාල ප්රතිලාභ උදාකර දෙනු ඇති බවයි.
මෙතෙක් කාලයක් ශ්රී ලාංකික PayPal ගිණුම් “මුදල් යැවීමට පමණක්” (Send Only) සීමා වී තිබූ බැවින්, දේශීය නිදහස් වෘත්තිකයන්ට (Freelancers) සහ කුඩා ව්යාපාරවලට ජාත්යන්තර සේවාදායකයන්ගෙන් මුදල් මෙරටට ලබා ගැනීමට නොහැකි විය. එමඟින් ඔවුන් දැඩි දුෂ්කරතාවලට මෙන්ම අවධිමත් මූල්ය වෙළෙඳපොළ (Grey Market) වෙත යොමුවීමේ අවදානමකට ලක්ව සිටියහ. මෙම සේවාව පුළුල් කිරීමත් සමඟ අන්තර්ජාලය ඔස්සේ සේවා සපයන සුළු හා මධ්ය පරිමාණ ව්යවසායකයන්ට (SMEs) තමන්ගේ ඉපැයීම් සෘජුවම මෙරට බැංකු ගිණුම් වෙත ලබාගත හැකි වේ. වසර 12ක අධික කාලයක් තිස්සේ පැවති සාකච්ඡා හා බාධාවලින් පසු, ලංකා බැංකුව (BOC), කොමර්ෂල් බැංකුව (Commercial Bank) සහ සම්පත් බැංකුව (Sampath Bank) හරහා පළමු අදියර යටතේ මෙම සේවා ක්රියාත්මක වන අතර එමඟින් රටට ලැබෙන නිල විදේශ විනිමය ප්රමාණය ඉහළ ගොස් සෙවනැලි කර්මාන්ත අවම වනු ඇත.
ඩිජිටල් ආර්ථික නියෝජ්ය ඇමැති එරංග වීරරත්න මහතා පෙන්වා දුන්නේ 2030 වන විට ඩිජිටල් ආර්ථිකයේ දායකත්වය දළ දේශීය නිෂ්පාදිතයෙන් (GDP) 20%ක් දක්වා එනම් ඩොලර් බිලියන 15ක ඉලක්කයක් කරා ගෙන යන බවයි. ඉදිරියේදී ඩිජිටල් මුදල් (Digital Currencies) සහ අතථ්ය වත්කම් (Virtual Assets) සඳහා ද නියාමන රාමු හඳුන්වා දෙන බව ඔහු කීය.
මෙම අවස්ථාවට PayPal ආයතනයේ ඉන්දියාව සහ දකුණු ආසියාව පිළිබඳ සංස්ථාපිත කටයුතු අධ්යක්ෂ නාත් පරමේෂ්වරන් (Nath Parameshwaran) සහ ආසියා පැසිෆික් කලාපීය සාමාන්යාධිකාරී නාඩියා සයීඩ් (Nadia Syed) යන මහත්ම මහත්මීන් ද එක්වෙමින් ලංකාවේ ‘2030 ඩිජිටල් ආර්ථික දැක්ම’ අගය කළහ. ඉදිරියේදී මෙම සේවාවන් භාවිතා කරන ආකාරය පිළිබඳව අදාළ බැංකු විසින් පාරිභෝගිකයන් කඩිනමින් දැනුවත් කිරීමට නියමිතය.
