පසුගිය ඔක්තෝබර් 3 වැනිදා අලුයම් කාලයේදී පැලවත්ත, පෙරේරා මාවත ප්‍රදේශයේදී ඉත්තෑවෙකු මරා රැගෙන ගිය බව කියන පුද්ගලයන් හඳුනා ගැනීම සඳහා පොලිසිය විමර්ශන ආරම්භ කර තිබේ.
අදාළ සිදුවීම අසල නිවසක ආරක්ෂිත කැමරා පද්ධතියක සටහන්ව තිබුණද, එම ස්ථානයට පැමිණි ත්‍රිරෝද රථයේ ලියාපදිංචි අංකය පැහැදිලිව හඳුනාගැනීමට නොහැකි වී ඇති බව වාර්තා වේ.
සිද්ධිය ඇසින් දුටු පුද්ගලයෙකු අසල්වැසියන්ගෙන් සහාය ඉල්ලා සිටියද, ඇතැම් නිවෙස්වලින් අපේක්ෂිත ප්‍රතිචාර නොලැබුණු බව මේ සම්බන්ධයෙන් ක්‍රියාත්මක වන පිරිස් පවසති.
ජාතික සත්ව අයිතිවාසිකම් සභාගයේ (JAN) සභාපති පූජ්‍ය ආචාර්ය ඕමල්පේ සෝභිත හිමියන්ගේ මැදිහත්වීමෙන් අනතුරුව, CCTV දර්ශන පරීක්ෂා කිරීම සඳහා තලංගම පොලිසියේ නිලධාරියෙකු එම ප්‍රදේශයට ගොස් තිබේ. වනජීවී සංරක්ෂණ දෙපාර්තමේන්තුවේ නිලධාරියෙකුද විමර්ශන සඳහා සහාය වීමට එම ස්ථානයට පැමිණ ඇත.
සිද්ධියට අදාළ CCTV දර්ශන මකා දැමීමට හෝ වෙනත් සාක්ෂි අහිමි වීමට පෙර කඩිනමින් විමර්ශන සිදුකළ යුතු බව මෙම සත්වයා වෙනුවෙන් සාධාරණය ඉල්ලා සිටින පිරිස් පෙන්වා දෙති.
