ශ්රී ලංකා පාර්ලිමේන්තුවේ කෝප් කමිටුව 2023 අප්රේල් සහ අගෝස්තු මාසවලදී පේරාදෙණිය විශ්වවිද්යාලයේ කටයුතු සමාලෝචනය කිරීම සඳහා පවත්වන ලද රැස්වීම් වාර දෙකකදී, එම විශ්වවිද්යාලය විසින් නිෂ්කාර්ය ලෙස වැය කර ඇති රුපියල් ලක්ෂ 56ක මුදලක් එකී අදූරදර්ශී තීරණය ගැනීමට වගකිවයුත්තන් වෙතින් ආපසු රජයට අය කරගත යුතු වන බවට තදබල නිර්දේශයක් ලබා දී තිබේ.
කෝප් කමිටුවේ මෙම නිර්දේශයෙන් වසර තුනකට අධික කාලයක් ගතවී තිබෙන මේ මොහොත වන විටත් එම විශාල මුදල අය කර ගැනීමට පේරාදෙණිය විශ්වවිද්යාලයේ බලධාරීන් කටයුතු කර නැති අතර, එම කාර්යය පැහැර හැරීම සඳහා කල් මරමින් සහ වංගු ගසමින් සිටින බව වාර්තා වේ.
2015 වර්ෂයේදී එම විශ්වවිද්යාලයේ ප්රධාන ආරක්ෂක නිලධාරියා විධිමත් පරීක්ෂණයකින් තොරව සේවයෙන් ඉවත් කිරීම හේතුකොටගෙන ඔහු ශ්රේෂ්ඨාධිකරණයේ මූලික අයිතිවාසිකම් නඩුවක් පවරා තිබුණි. 2021 දී ලබා දුන් එහි තීන්දුව මගින් විශ්වවිද්යාලය ගත් එම ක්රියාමාර්ගය ස්වාභාවික යුක්තියේ මූලධර්මයන්ට පටහැනි බව තීරණය කරමින් බලශූන්ය කිරීමට ශ්රේෂ්ඨාධිකරණය කටයුතු කර තිබුණි. මෙම තීන්දුව නිසා 2015 සිට 2022 දක්වා වසර 7ක කාලයක් හිඟ වැටුප් සහ දීමනා ලෙස රුපියල් ලක්ෂ 56කට ආසන්න මුදලක් එකී නිලධාරියාට ගෙවීමට පේරාදෙණිය විශ්වවිද්යාලයට සිදුව තිබුණි.
මෙම වැය අදාළ නිලධාරියාගෙන් කිසිදු සේවයක් ලබා ගැනීමෙන් තොරව ගෙවීමට සිදුව තිබීම හේතුවෙන් එය නිෂ්කාර්ය වැයක් ලෙස සලකා, එකී විචක්ෂණශීලී නොවන සේවයෙන් ඉවත් කිරීමේ තීරණය ගත් බලධාරීන්ගෙන් එම මුදල ආපසු අය කරගත යුතු වන බව විගණකාධිපතිවරයා විශේෂ විගණන වාර්තාවක් මගින් නිර්දේශ කර තිබුණි. මෙම විගණන වාර්තාව සලකා බැලූ කෝප් කමිටුව අදාළ නිර්දේශය ලබා දී තිබුණි. එකී කෝප් කමිටු රැස්වීමේදී එවකට විගණකාධිපති චූලන්ත වික්රමසිංහ මහතා ප්රකාශ කර තිබුණේ බලධාරීන් එම කාර්යය පැහැර හැරියහොත්, විගණකාධිපතිවරයා වෙත පැවරී ඇති බලතල ප්රකාරව එම මුදල ආපසු අය කර ගැනීමට තමන් කටයුතු කරන බවය.
පේරාදෙණිය විශ්වවිද්යාලයීය බලධාරීන් මෙම අදූරදර්ශී ක්රියාවට වගකිවයුතු පුද්ගලයන් කවුරුන්දැයි කිසිදු සොයාබැලීමකින් තොරව වංගු ගසමින් මෙම කටයුත්තෙන් මගහැර යාමට කටයුතු කරන හෙයින්, මෙම තකතීරු ක්රියාවේ සැබෑ වගකිවයුත්තන් කවුරුන්දැයි අපි හෙළිදරව් කර සිටින්නෙමු.
– මතු සම්බන්ධයි
