පේරාදෙණිය විශ්වවිද්යාලයේ පවතින තනතුරු සිය ගණනක් පුද්ගල බද්ධ තනතුරු බව පසුගිය අගෝස්තු 05 වන දින පැවැති කෝප් (COPE) සමාලෝචන රැස්වීමේදී අනාවරණය විය. එහිදී සාකච්ඡාවට බඳුන් වූ ”අභ්යන්තර විගණක” නැමැති තනතුරද එසේ පුද්ගලබද්ධව නිර්මාණය කරන ලද ”පේරාදෙණිය ස්පෙෂල්” වර්ගයේ තනතුරක් බවත්, එකී තනතුර නිර්මාණය කිරීම පිටුපස සේවා අවශ්යතාවයට එහා ගිය පෞද්ගලික වුවමනාවන් සැඟවී තිබෙන බවත් හෙළිදරව් වී තිබේ.
දේශපාලන ව්යාපෘති සඳහා සහාය දැක්වීමට ත්යාගයක් ලෙස එකී තනතුර නිර්මාණය කිරීමත්, අදාළ පුද්ගලයාට සුදුසුකම් සම්පූර්ණ වන තෙක් එම පුරප්පාඩුව පවත්වා ගැනීමත්, ඒ වන විටත් සුදුසුකම් සපුරා සිටි නිලධාරීන් සිය නිල බලය භාවිතා කර පලවා හැරීමත් ආදී ක්රියාවන් රැසක් සමග බැඳුණු මෙම සුවිශේෂී තනතුර සම්බන්ධයෙන් මෙතෙක් නිසි අනාවරණයක් සිදුවී නොමැති බව පෙනෙන්නට ඇත.
වාර්තා වන තොරතුරුවලට අනුව, මධ්යම පළාත තුළ හිටපු ජනාධිපති ගෝඨාභය රාජපක්ෂ මහතාගේ ”වියත්මග” දේශපාලන ව්යාපෘතිය වෙනස් මුහුණුවරකින් දියත් කරන ලද්දේ මහාචාර්ය එම්. ඩී. ළමාවංශ මහතා විසිනි. මෙම දේශපාලන ව්යාපෘතියේ ඔහුගේ ප්රධාන සහායකයින් ලෙස කටයුතු කර ඇත්තේ එවකට ජ්යෙෂ්ඨ සහකාර මූල්යාධිකාරී ලෙස කටයුතු කළ තුසිල් වීරසේකර සහ ජ්යෙෂ්ඨ සහකාර අභ්යන්තර විගණක නිශ්ශංක අරම්පත් බව තතු දන්නෝ පවසති.
මෙම දේශපාලන ව්යාපෘතිය වෙනුවෙන් සිදුකළ කැපකිරීම්වලට ප්රතිඋපකාර ලෙස මහාචාර්ය ළමාවංශ මහතාට පේරාදෙණියේ උපකුලපති තනතුරත්, අරම්පත් මහතාට මූල්යාධිකාරී තනතුරත් වෙන්කර (Reserved) තිබූ බවත්, තුසිල් වීරසේකර මහතා වෙනුවෙන් මූල්යාධිකාරී තනතුරට සමාන අභ්යන්තර විගණක (Internal Auditor) නම් නව තනතුරක් නිර්මාණය කර දීමට පොරොන්දුවක් තිබූ බවත් කියැවේ.
ගෝඨාභය රාජපක්ෂ මහතා ජනාධිපති වීමෙන් පසුව, පොරොන්දු වූ පරිදිම සුදුස්සන් කපා හරිමින් දේශපාලන බලය භාවිත කර ළමාවංශ මහතාට උපකුලපති තනතුරද, අරම්පත් මහතාට මූල්යාධිකාරී තනතුරද ත්යාග ලෙස ලැබුණු බව වාර්තා වේ.
ඉන් අනතුරුව, උපකුලපති ධූරයේ බලතල භාවිතා කරමින් මෙම ප්රශ්නගත අභ්යන්තර විගණක තනතුර ස්ථාපිත කෙරුණු නමුත්, එකී ඉහළ පෙළේ තනතුර සඳහා ඒ වන විටත් තුසිල් වීරසේකර මහතාට වඩා ජ්යෙෂ්ඨතාවයෙන්, සුදුසුකම්වලින් මෙන්ම දක්ෂතාවයෙන්ද ඉහළ නිලධාරීන් දෙදෙනෙකුම විශ්වවිද්යාලයේ සේවය කිරීමත්, වීරසේකර මහතාට අදාළ තනතුර සඳහා වන සේවා පළපුරුද්ද ප්රමාණවත් නොවීමත් මෙම සැලසුමට බාධාවක් වී තිබුණි.
ඒ අනුව, පළමුව අදාළ සුදුසුකම් ලත් පුද්ගලයන් දෙදෙනා අධෛර්යමත් කර පලවා හැරීමටත්, දෙවනුව තුසිල් වීරසේකර මහතාගේ සේවා පළපුරුද්ද සම්පූර්ණ වන තෙක් එම තනතුරේ පුරප්පාඩුව හිස්ව පවත්වාගැනීමටත් කටයුතු කර ඇති බව අනාවරණය වේ.
– මතු සම්බන්ධයි
