පේරාදෙණියේ ඉහළ බලධාරීන් නීතිමය වශයෙන් කළ නොහැකි වැරදි ක්රියාවන් එසේ නොවන නීත්යානුකූල කටයුතු බව පෙන්වමින් සිදු කිරීමට රුසියෝය. මෙවැනි තක්කඩි ක්රියාවන්ට අපගේ මුතුන්මිත්තෝ කීවේ ”උගුරට හොරා බෙහෙත් බොනවා වාගෙයි” කියාය. එවැනි දැන දැන සිදු කරනු ලබන තවත් වරදක් පේරාදෙණියෙන් අපට වාර්තා වේ.
රජයේ සේවකයෙකුට එම ආයතනය සමග වාණිජමය ගනුදෙනු සිදු කිරීම මෙන්ම කොන්ත්රාත් වැනි කටයුතු සඳහා ගිවිසුම් ඇති කර ගැනීමද සපුරාම තහනම්ය. එය “සම්බන්ධතා අතර ගැටුම් ඇති කරනු ලබන” ක්රියාවන් ලෙස සැලකේ (Conflict of Interest). එම සියලු නීතිමය තත්ත්වයන් නොසලකා, පේරාදෙණිය විශ්වවිද්යාලයේ ආරක්ෂක අංශයේ ආරක්ෂක නියාමකයෙකුට විශ්වවිද්යාල ආපනශාලා දෙකක් පවත්වාගෙන යාම සඳහා ටෙන්ඩරයක් ලබා දී තිබේ.
වැලිආරාවේ ගෙදර වසන්ත බණ්ඩාර යන මෙම පුද්ගලයා ආරක්ෂක අංශයේ ආරක්ෂක නියාමකවරයෙකු ලෙස කටයුතු කරන අතරම, සිය බිරිඳගේ නමින් සෙනෙට් මන්දිරයේ කාර්යමණ්ඩල ආපනශාලා දෙක පවත්වාගෙන යාම සඳහා මෙම ටෙන්ඩරය ලබාගෙන තිබේ. සිය බිරිඳගේ නම භාවිතා කළද මෙම ටෙන්ඩරය ලබා ගැනීම සඳහා වන සියලු කටයුතු සිදු කර තිබෙන්නේද මෙම පුද්ගලයා විසිනි.
මෙම ආපනශාලා දෙකෙන් සෙනෙට් මන්දිරයේ තෙවැනි මහලේ කොටසක පවත්වාගෙන යන ආපනශාලාව අතුරු බදු දී වෙනත් පුද්ගලයෙකු මාර්ගයෙන් පවත්වාගෙන යන අතර, ප්රධාන පුස්තකාලය පිටුපස පිහිටි ”අල කැන්ටිම” යනුවෙන් හඳුන්වනු ලබන ආපනශාලාව එම පුද්ගලයා විසින්ම පවත්වාගෙන යනු ලබයි.
මෙම පුද්ගලයා සිය රාජකාරී සේවා මුර යොදා ගන්නේද එකී ආපනශාලාවේ කටයුතුවලට බාධාවක් නොවන පරිදි සිය අභිමතය පරිදිය. බොහෝ අත්යවශ්ය රාජකාරී අවස්ථාවලදී පවා නිවාඩු ලබා ගනිමින් ආපනශාලාවේ ව්යාපාරික කටයුතුවල නියැලී සිටිනු දකින්නට ලැබේ.
පසුගිය උපාධි ප්රදානෝත්සවය පැවැති ජූනි මස 24, 25 සහ 26 දිනවලදී අන් සියලු ආරක්ෂක නිලධාරීන්ට රාජකාරියට වාර්තා කිරීම අනිවාර්ය කර තිබියදී මෙම පුද්ගලයා පමණක් නිවාඩු ලබාගෙන සිය ආපනශාලාවේ ව්යාපාරික කටයුතුවල නිරතව සිට ඇති බවත්, ඒ සම්බන්ධයෙන් ආරක්ෂක අධ්යක්ෂවරයා විසින් ඔහුට අවවාද කිරීමේ ලිපියක් නිකුත් කර තිබෙන බවත් අප වෙත වාර්තා වේ.
හිටපු පාර්ලිමේන්තු මන්ත්රී ඩිලාන් පෙරේරා විසින් එවකට රජයේ අමාත්යවරයෙකු වූ රාජිත සේනාරත්නට එරෙහිව අභියාචනාධිකරණයේ පවරන ලද නඩුවකදී, 2000 වසරේදී ලබා දුන් තීන්දුවට අනුව රාජිත සේනාරත්න මහතාගේ පාර්ලිමේන්තු මන්ත්රී ධූරය අහෝසි කිරීමට අභියාචනාධිකරණය කටයුතු කළේය. එම නඩුවට පදනම් වූයේ සේනාරත්න මහතා තමන් අධ්යක්ෂ ධූරයක් දැරූ සමාගමක් මගින් රජයට වෛද්ය උපකරණ සැපයීම සඳහා ගිවිසුමකට එළඹ තිබීමයි. එම තත්ත්වය “සම්බන්ධතා අතර නියත ගැටුමක්” ඇති කරනු ලබන බව අභියාචනාධිකරණය තීරණය කළේය. සමාන නෛතික තත්ත්වයන් අවබෝධ කර ගැනීම සඳහා පේරාදෙණිය බලධාරීන්ට එම නඩු තීන්දුව අන්තර්ජාලය මගින් ලබාගෙන පරිශීලනය කළ හැකිය.
