කිසියම් පුද්ගලයෙකුට විශ්වවිද්යාල ආරක්ෂක සේවයට ඇතුළත් වීම පහසු කරුණක් නොවේ. පවතින රජය පත් වීමට පෙර ඒ සඳහා පැවැති බඳවාගැනීමේ ක්රමවේදය වූයේ උසස් අධ්යාපන ඇමතිවරයා විසින් විශ්වවිද්යාලය වෙත එවනු ලබන නම් ලැයිස්තුවක් තුළින් සම්මුඛ පරීක්ෂණයකට ලක්කොට පුද්ගලයන් තෝරා ගැනීමයි. එම ක්රමවේදයට අනුව පිරිමි පුද්ගලයන් නම් ඇමතිවරයාගේ දේශපාලන ව්යාපාරයට සක්රීයව දායක වී තිබිය යුතු අතර, කාන්තාවන් සඳහා වන සුදුසුකම් සම්බන්ධයෙන් විවිධ අසභ්ය චෝදනා සහ අනිවාර්ය කොන්දේසි පිළිබඳ සමාජ කතාබහක් පවතී.
මෙසේ අසීරුවෙන් ලබාගන්නා රජයේ ස්ථිර රැකියාවක් තම තරුණ කාලයේදීම අතහැර දමා ඉල්ලා අස්වීමට කිසිවෙක් කටයුතු කරන්නේ නම් ඊට බලපාන ලද ප්රබල හේතුවක් හෝ හේතු කිහිපයක් තිබිය යුතුමය. පසුගිය මාස කිහිපය ඇතුළත පේරාදෙණිය විශ්වවිද්යාලයේ ආරක්ෂක අංශයේ ස්ථිර පත්වීම් ලාභී නිලධාරීන් තිදෙනෙකු හදිසියේ ඉල්ලා අස්වීමට කටයුතු කර තිබෙන බවත්, තවත් කිහිප දෙනෙකු ඊට සූදානමින් සිටින බවත් අප වෙත වාර්තා වේ. මෙසේ ඉල්ලා අස්ව ගොස් තිබෙන්නේ ගයාන් මධුෂංක, නිලන්ත ඉගුරුවත්ත සහ යූ.ජී.බී. බණ්ඩාර නම් ආරක්ෂක නියාමකයන් තිදෙනෙකි.
මෙම ඉල්ලා අස්වීම්වලට ආසන්නම හේතුව වී තිබෙන බව කියන්නේ සිය දක්ෂතා සඳහා නිසි ඇගයීමක් නොලැබීමත්, ඉහළ නිලධාරීන් කිහිපදෙනෙකුගේ පුද්ගලික පළිගැනීම්වලට නිරන්තරයෙන් ලක් වීමත් බව කියනු ලැබේ. මෙම තත්ත්වය සම්බන්ධයෙන් ඉහළ පරිපාලනයට පැමිණිලි කළද ඔවුන් කිසිම සැලකිල්ලක් නොදැක්වීම හේතුවෙන් අදාළ නිලධාරීන් හදිසියේ ඉල්ලා අස්වීමට කටයුතු කර තිබේ.
මෙසේ හදිසියේ ඉල්ලා අස්ව ගොස් තිබෙන ගයාන් මධුෂංක නම් නිලධාරියා තවත් වසර 25ක් තරම් දීර්ඝ කාලයක් සේවය කිරීමට ඉතිරිව තිබෙන සහ විශ්වවිද්යාල භූමිය තුළ හෙරොයින් සහ අයිස් මත්ද්රව්ය බෙදාහරින්නන් ලුහුබැඳ ගොස් අල්ලා ගැනීමට සමත්වීම හේතුවෙන් අවස්ථා කිහිපයකදීම සේවය අගය කිරීමටද ලක්වූ නිලධාරියෙක් බව දැන ගන්නට ඇත.
