1978 අංක 16 දරණ විශ්වවිද්යාල පනතට අනුව, ශ්රී ලංකාවේ රාජ්ය විශ්වවිද්යාලවලට සිසුන් තෝරාගැනීම සම්බන්ධයෙන් බලය ලත් එකම ආයතනය විශ්වවිද්යාල ප්රතිපාදන කොමිෂන් සභාවයි (UGC). ඒ අනුව පේරාදෙණිය විශ්වවිද්යාලයේ ශාස්ත්ර පීඨයේ මනෝවිද්යා විෂයධාරාවෙන් විශේෂවේදී උපාධියක් හැදෑරීම සඳහා දක්ෂිකාට අවස්ථාව සලසා දෙමින් එම කොමිෂන් සභාව විසින් නිකුත් කරන ලද අංක UGC/AD/05 දරණ 2018 පෙබරවාරි 19 දිනැති ලිපිය, එම කටයුත්ත සඳහා ශ්රී ලංකාව තුළ ප්රමාණවත් අධිකාරියක් සහිත නීත්යනුකූල ලියවිල්ලකි.
එහෙත් පේරාදෙණිය විශ්වවිද්යාලයේ ශාස්ත්ර පීඨයේ ඉංග්රීසි දෙපාර්තමේන්තුවේ අධ්යයනාංශ ප්රධාන මහාචාර්ය කාමන් වික්රමගමගේ විසින් දරණ ලද “අනම්ය” ස්ථාවරය වූයේ, දක්ෂිකා අතිරේක බඳවාගැනීම් යටතේ ඇතුළත් වූවෙකු බැවින්, අදාළ ඉංග්රීසි විෂයමාලාව හැර වෙනත් විෂයමාලාවක් සඳහා විශේෂවේදී උපාධි අවස්ථාව ලබාදිය නොහැකි බවයි.
මේ සම්බන්ධයෙන් තීරණයක් ගැනීම සඳහා එවකට පීඨාධිපති මහාචාර්ය ඕ.ජී. දයාරත්න බණ්ඩා විසින් හදිසි පීඨ මණ්ඩල රැස්වීමක් (Faculty Board) කැඳවනු ලැබීය. සිසුවියකගේ බඳවාගැනීමට අදාළ කරුණක් සම්බන්ධයෙන් UGC හි ලිඛිත නියෝග තිබියදී, එය නොසලකා හැර පීඨ මණ්ඩල රැස්වීමක ඡන්දයකින් තීරණය කිරීමට යාම, අතීතයේ කී පරිදි “නොකෙරෙන වෙදකමට කෝදුරු තෙල් හත්පට්ටයකුත් තවත් ටිකක්” සෙවීම වැනි ක්රියාවක් විය.
ශාස්ත්ර පීඨයේ පීඨ මණ්ඩලය සාමාජිකයන් 180කට ආසන්න පිරිසකින් සමන්විත වුවද, මෙම විශේෂ රැස්වීම සඳහා සහභාගී වී ඇත්තේ සාමාජිකයන් 30ක් පමණි. එහිදී දක්ෂිකාට මනෝවිද්යා උපාධි පාඨමාලාව හැදෑරීමට අවසර දිය යුතුද නැද්ද යන්න ඡන්දයකට භාජනය කෙරිණි. එහි ප්රතිඵලයක් ලෙස එකම එක් ඡන්දයකින් දක්ෂිකාට එම අවස්ථාව අහිමි කිරීමට තීරණය විය.
මෙම සිදුවීමෙහි අසාධාරණත්වය සම්බන්ධයෙන් පීඨයේ අධ්යයන මණ්ඩල සාමාජිකයන් අතර බරපතල විවේචන මතු විය. එම විවේචනවල සාධාරණත්වය හේතුවෙන් අදාළ කාරණය නැවත මීළඟ පීඨ මණ්ඩල රැස්වීමට ඉදිරිපත් කිරීමට පීඨාධිපතිවරයාට සිදුවිය. ඒ අනුව, 2018 මැයි 24 වන දින පැවැති පීඨ මණ්ඩල රැස්වීමේදී විශාල වැඩි ඡන්ද සංඛ්යාවකින් දක්ෂිකාට මනෝවිද්යා විශේෂ උපාධි පාඨමාලාව හැදෑරීමට ඉඩදිය යුතු බව ස්ථිර කෙරිණි. එම තීරණයට අනුව 2018 මැයි 26 දින ඇය සිය ලියාපදිංචිය සම්පූර්ණ කළාය.
සටනේ එක් තීරණාත්මක අදියරක් දක්ෂිකා ජයග්රහණය කළද, ඇය පසුපස හඹා එමින් සිටි වෛරක්කාරයන් ඉන් පසුබා යාමට සූදානම් නොවීය. වඩාත් සංවිධානාත්මක ප්රහාරයක් දියත් කරමින් දක්ෂිකාගේ අනාගතය විනාශ කිරීමට තිරය පිටුපස විකල්ප මෙහෙයුමක් ක්රියාත්මක වෙමින් තිබුණි.
– දක්ෂිකාට එරෙහි මාධ්ය මෙහෙයුම ක්රියාත්මක වූ ආකාරය ඊළඟ කොටසින් බලාපොරොත්තු වන්න
