පේරාදෙණිය විශ්වවිද්යාලයේ කීර්තිනාමයට සහ ප්රතිරූපයට දැඩි සේ හානි කිරීමේ (Tarnish university image) චේතනාවෙන්, ඇතැම් වෙබ් අඩවි සහ සමාජ මාධ්ය ජාලා උපයෝගී කරගනිමින් සංවිධානාත්මක ලෙස අසත්ය, විකෘති කරන ලද සහ තහවුරු නොකළ පුවත් ප්රචාරය කිරීමේ ඉලක්කගත දේශපාලන හෝ පෞද්ගලික ව්යාපාරයක් ක්රියාත්මක වන බවට එම විශ්වවිද්යාලයේ උපකුලපති මහාචාර්ය ටෙරන්ස් මධුජිත් මහතා නිල ප්රකාශයක් නිකුත් කරමින් දැඩි චෝදනාවක් එල්ල කර තිබේ.
අද Daily news පුවත්පත් වාර්තා කරන පරිදි, මෙම සංවිධානාත්මක ප්රචාරණ ව්යාපෘතියට එරෙහිව වහාම ක්රියාත්මක වන පරිදි අපරාධ පරීක්ෂණ දෙපාර්තමේන්තුව (CID) වෙත නිල පැමිණිල්ලක් ඉදිරිපත් කිරීමට විශ්වවිද්යාල පාලනාධිකාරිය පියවර ගෙන ඇත. රාජ්ය ආයතනයක් තුළ යම් අක්රමිකතාවක් පිළිබඳ චෝදනාවක් මතු වූ විට ඒ සඳහා අනුගමනය කළ යුතු නිශ්චිත සහ විධිමත් පටිපාටියක් පවතින බව පෙන්වා දෙන උපකුලපතිවරයා, එවැනි අභ්යන්තර විමර්ශන සිදුවෙමින් පවතින අතරතුර කරුණු විකෘති කරමින් සමාජ මාධ්ය ඔස්සේ ප්රසිද්ධ කිරීම පිටුපස සැඟවුණු න්යාය පත්රයක් ක්රියාත්මක වන බව අවධාරණය කරයි.
විශේෂයෙන්ම, විශ්වවිද්යාලයේ හිටපු උපකුලපතිවරයෙකු විසින් පුස්තකාලයෙන් ලබාගත් පොත් හතරක් නැවත භාර දී නොමැති බවට අසත්ය වාර්තාවක් සමාජ මාධ්ය පුරා සංසරණය වූ බව මහාචාර්ය ටෙරන්ස් මධුජිත් මහතා පෙන්වා දෙයි. අදාළ පොත් කිසිදු අඩුවකින් තොරව නිසි පරිදි නැවත භාර දී ඇති බවට ප්රධාන පුස්තකාලයාධිපතිවරයා නිල වශයෙන්ම තහවුරු කර තිබියදීත්, හිටපු උපකුලපතිවරයාගේ සහ සමස්ත විශ්වවිද්යාලයේ කීර්තිනාමය කෙලෙසීම සඳහා මෙවැනි ව්යාජ පුවත් මවාපෑම කිසිසේත්ම අනුමත කළ නොහැකි බව හෙතෙම කියා සිටී. ඉදිරියේදී ද විශ්වවිද්යාලීය ප්රතිරූපයට හානි වන අයුරින් සමාජ මාධ්ය ඔස්සේ සිදුවන මෙවැනි විකෘති කිරීම් සහ අසත්ය ප්රචාරයන් මෙහෙයවන පුද්ගලයන්ට (Online wrongdoers) එරෙහිව තරාතිරම නොබලා දැඩි නීතිමය පියවර ගන්නා බව උපකුලපතිවරයා වැඩිදුරටත් අවධාරණය කර තිබේ.
