අවතැන්වූ පවුල් 409 ක ප්‍රමාණයක් උතුරු නැගෙනහිර පළාත්වල මේ වනවිට සිටින බවත්, මෙම වසර තුළ ඔවුන්ට ස්ථීර නිවාස ලබා දී පදිංචි කරවන බවත්, ග්‍රාමීය නිවාස හා ඉදිකිරීම් සහ ගොඩනැගිලි ද්‍රව්‍ය කර්මාන්ත ප්‍රවර්ධන රාජ්‍ය අමාත්‍ය ඉන්දික අනුරුද්ධ මහතා පවසයි.
රාජ්‍ය අමාත්‍යවරයා මේ බව කියා සිටියේ “ඔබට ගෙයක් – රටට හෙටක්” ජාතික නිවාස වැඩසටහන යටතේ මීගමුව, දළුපත ප්‍රදේශයේ ඉදිකළ නව නිවස සහ කොච්චිකඩේ, දළුවාකොටුව ප්‍රදේශයේ ඉදිකළ නව නිවස ජනතා අයිතියට පත් කිරීමේ අවස්ථාවට සහභාගී වෙමිනි.
ජනාධිපති ගෝඨාභය රාජපක්ෂ මහතා බලයට පත් වීමෙන් පසුව අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් පසුගිය පෙබරවාරී මාසයේදී “ඔබට ගෙයක් – රටට හෙටක්” ජාතික නිවාස වැඩසටහන ආරම්භ කරන ලදි. මෙම වැඩසටහන යටතේ ග්‍රාමසේවා මට්ටමින් දිවයින පුරා නිවාස 14,022 ක් ඉදි කෙරේ.
මෙම අවස්ථාවට හිටපු අමාත්‍ය සරත් කුමාර ගුණරත්න මහතා, මීගමුව ප්‍රාදේශීය ලේකම් අයේෂා පතරණ මහත්මිය සහ ප්‍රදේශීය දේශපාලඥයින් ඇතුළු විශාල පිරිසක් සහභාගි වූහ.
