සියලු ශ්රමයන් අගය කරන, අයිතිවාසිකම් සුරක්ෂිත වූ සහ සමානාත්මතාවය රජයන රටක් ගොඩනැගීම සඳහා සමස්ත වැඩ කරන ජනතාව සමඟ එකමුතුව පෙරට යාමේ වැදගත්කම මැයි දිනයේදී යළි තහවුරු කළ යුතු බව අග්රාමාත්ය හරිනි අමරසූරිය මහත්මිය පවසයි. ජාත්යන්තර කම්කරු දිනය නිමිත්තෙන් පණිවුඩයක් නිකුත් කරමින් ඇය මේ බව සඳහන් කළාය.
ශ්රී ලාංකේය කම්කරු ඉතිහාසය යනු දශක ගණනාවක් පුරා අයිතිවාසිකම් දිනාගැනීම වෙනුවෙන් ලේ, කඳුළු සහ දහඩිය හෙළූ අභිමානවත් අරගලයක කතාවක් බව සිහිපත් කළ අගමැතිනිය, 1893 මුද්රණ ශිල්පීන්ගේ වැඩවර්ජනයේ සිට අද දක්වා මෙරට ආර්ථික හා සමාජීය පෙරළියේ නියමුවා වැඩ කරන ජනතාව බව අවධාරණය කළාය.
මෙවර මැයි දිනය සුවිශේෂී වන්නේ මහජන බලයෙන් ගොඩනැගුණු රජයක් යටතේ එය සැමරීම හේතුවෙන් බවත්, ශ්රමය සඳහා නිසි ගෞරවය ලබා දීම සහ සියලු වැඩ කරන ජනතාවගේ අයිතිවාසිකම් සුරක්ෂිත කිරීම රජයේ මූලික ප්රතිපත්තිමය කැපවීම බවත් ඇය පෙන්වා දුන්නාය. විශේෂයෙන්ම වැටුප් රහිත ශ්රමය හඳුනාගනිමින්, එවැනි ශ්රමිකයින් සඳහා ද සමාජ ආරක්ෂණය සහතික කරන ජාතික වැඩපිළිවෙළක් ස්ථාපිත කිරීම රජයේ ප්රමුඛ කාර්යයක් බව අග්රාමාත්යවරිය වැඩිදුරටත් සඳහන් කළාය.
සියලු වැඩ කරන ජනතාවගේ ශක්තිය හා කැපවීම තුළින් “පොහොසත් රටක් – ලස්සන ජීවිතයක්” යන පොදු දැක්ම ඉතා ඉක්මනින් සපුරා ගැනීමට හැකි වේවායි ප්රාර්ථනා කරමින් ඇය සිය සුබ පැතුම් එක් කළාය.
