කොළඹ දිස්ත්රික්කයේ සංවර්ධන ව්යාපෘති ක්රියාත්මක කිරීමේදී ජනතාවගේ ප්රායෝගික අවශ්යතාවලට ප්රමුඛතාවය ලබා දිය යුතු බව අග්රාමාත්ය ආචාර්ය හරිනි අමරසූරිය අවධාරණය කරයි. ඊයේ (12) පැවති දිස්ත්රික් සැලසුම් කමිටු රැස්වීමේදී ඇය පෙන්වා දුන්නේ යටිතල පහසුකම් සංවර්ධනය සහ දරිද්රතාවය තුරන් කිරීමේ වැඩසටහන් වඩාත් ඵලදායී ලෙස මහජනතාව වෙත සමීප කළ යුතු බවයි. විමධ්යගත අයවැය සහ විවිධ අමාත්යාංශ ප්රතිපාදන යටතේ කොළඹ දිස්ත්රික්කය වෙනුවෙන් වෙන් කර ඇති විශාල අරමුදල් ප්රමාණය ක්රමවත් කළමනාකරණයකට යටත් කිරීම මෙහි ප්රධාන අරමුණ වී තිබේ.
ඒ අනුව 2026 වර්ෂය සඳහා රුපියල් මිලියන 195 කට අධික ප්රතිපාදන වෙන් කර ඇති අතර, දැනටමත් ව්යාපෘති 126 ක් සඳහා අනුමැතිය හිමි වී තිබේ. මාර්ග ආරක්ෂාව තහවුරු කිරීම වෙනුවෙන් රුපියල් මිලියන 100 ක් සහ දරිද්රතාවය තුරන් කිරීමේ “ප්රජා ශක්ති” වැඩසටහන සඳහා රුපියල් මිලියන 1036 ක දැවැන්ත මුදලක් වෙන් කර ඇති බව මෙහිදී අනාවරණය විය. මීට අමතරව 2027 වර්ෂය ඉලක්ක කරගනිමින් ග්රාමීය පාලම් සහ මාර්ග කිලෝමීටර් 50 ක් සංවර්ධනය කිරීමේ සැලසුම් ද නිලධාරීන් විසින් ඉදිරිපත් කරන ලදී.
මෙම සියලු ව්යාපෘති 2026 නොවැම්බර් 30 වන විට අවසන් කරන ලෙස අග්රාමාත්යවරිය නියෝග කර ඇති අතර, ඒ හරහා සංවර්ධනයේ ප්රතිලාභ කඩිනමින් ජනතාව වෙත ළඟා කර දීමට රජය අපේක්ෂා කරයි. අධිකරණ අමාත්ය හර්ෂණ නානායක්කාර ඇතුළු මහජන නියෝජිතයන් රැසකගේ සහභාගීත්වයෙන් පැවති මෙම සාකච්ඡාවේදී පාසල් ක්රීඩා පිටි සහ පරිසර ව්යාපෘති කෙරෙහි ද අවධානය යොමු විය. මෙම වැඩසටහන් සමස්තයක් ලෙස කොළඹ දිස්ත්රික්කයේ සමාජ-ආර්ථික ස්ථාවරත්වය සහ ජන ජීවිතයේ ගුණාත්මකභාවය ඉහළ නැංවීමට මනා පිටුවහලක් වනු ඇතැයි විශ්වාස කෙරේ.
