රේල් පාරවල් සහ මහාමාර්ගවල සිදුවන අනතුරු අවම කරමින් ජනතාවගේ ආරක්ෂාව තහවුරු කිරීම සඳහා ධාවනයට නුසුදුසු සහ අනවසරයෙන් වෙනස් කරන ලද (Modified) වාහන හඳුනාගෙන ඒවා ධාවනයෙන් ඉවත් කිරීමේ දැවැන්ත රටපුරා මෙහෙයුමක් ශ්රී ලංකා පොලිසිය විසින් ආරම්භ කර තිබේ. පසුගිය සඳුදා අධිවේගී මාර්ග කේන්ද්ර කරගනිමින් ඇරඹි මෙම විශේෂ මෙහෙයුම මේ වන විට දිවයින පුරා ක්රියාත්මක වන පරිදි පුළුල් කර ඇති බව මෝටර් රථ ප්රවාහන හා මාර්ග ආරක්ෂාව පිළිබඳ නියෝජ්ය පොලිස්පති (DIG) ඩබ්ලිව්.පී.ජේ. සේනාධීර මහතා ප්රකාශ කළේය.
මෝටර් රථ පරීක්ෂකවරුන්ගේ (RMV) සහාය ඇතිව සිදුකෙරෙන මෙම මෙහෙයුමේදී, ධාවනයට නුසුදුසු තත්ත්වයේ පවතින වාහනවලට ධාවන තහනම් නියෝග නිකුත් කිරීමටත්, ඒවායේ අයිතිකරුවන්ට එරෙහිව උසාවිය මඟින් දැඩි නීතිමය පියවර ගැනීමටත් නියමිතය. මෙහිදී ප්රධාන වශයෙන්ම අනවසරයෙන් උස්සන ලද බම්පර් (Raised bumpers), වෙනස් කරන ලද පැති කණ්ණාඩි (Side mirrors) සහ අනෙක් රියදුරන්ගේ ඇස් නිලංකාර වන පරිදි සවිකර ඇති අධික ආලෝකයෙන් යුත් විදුලි ලාම්පු (Bright LED/HID lighting) සහිත වාහන කෙරෙහි දැඩි අවධානයක් යොමු කෙරේ.
මීට අමතරව අධික ලෙස කළු දුමාරය පිටකරන වාහන, නිසි නඩත්තුවකින් තොරව දිරාපත්ව ඇති වාහන ද මෙහිදී පරීක්ෂාවට ලක් කෙරෙන අතර, එවැනි වාහන අයිතිකරුවන්ට දඩ මුදල් පැනවීමට මෙන්ම වාහන තහනම් කිරීමට ද කටයුතු කරනු ඇත. නියෝජ්ය පොලිස්පතිවරයා පෙන්වා දෙන්නේ මෙලෙස අනවසරයෙන් වෙනස් කරන ලද වාහන අනතුරකට ලක්වීමේදී සිදුවන හානිය ඉතා ඉහළ මට්ටමක පවතින බවත්, විශේෂයෙන්ම පදිකයන්ගේ ආරක්ෂාව වෙනුවෙන් මෙම පියවර ගත් බවත්ය.
එමෙන්ම, අනවසර උපාංග සවිකරන ලද සහ අධික ශබ්දයක් නිකුත් කරන සයිලන්සර් (Noisy exhaust) සහිත යතුරුපැදි පොලිස් භාරයට ගැනීමට කටයුතු කරන බව ද පොලිසිය අනතුරු අඟවයි. නීති විරෝධී ලෙස මහාමාර්ගවල යතුරුපැදි තරඟවල (Street racing) යෙදෙන සහ අනතුරුදායක ලෙස ‘වීලි’ (Wheelies) ගසන තරුණයන් අත්අඩංගුවට ගෙන ඔවුන් මත්ද්රව්ය භාවිත කර ඇත්දැයි සෙවීම සඳහා වෛද්ය පරීක්ෂණවලට (Drug tests) භාජනය කිරීමට ද මෙම විශේෂ මෙහෙයුම යටතේ පියවර ගැනේ.
