අදට (01) යෙදී ඇති ලෝක ළමා දිනය වෙනුවෙන් මෙරට සමස්ත දූ දරුවන්ට උණුසුම් සුබපැතුම් එක් කරන අග්‍රාමාත්‍‍ය ආචාර්ය හරිනි අමරසූරිය මෙනවිය, දරුවන්ගේ මනස සවිමත් කිරීම සහ ඔවුන්ගේ අභ්‍යන්තර හැකියාවන්නැං වීම සෘජුවම සමස්ත රටේ අනාගතය ශක්තිමත් කිරීමක් වන බව අවධාරණය කරයි. වත්මන් සමාජයේ දරුවන් වෙනුවෙන් හුදෙක් අධ්‍යාපන අවස්ථා ලබාදීමට පමණක් සීමා නොවී, වේගයෙන් වෙනස් වන ගෝලීය පරිසරයකට සාර්ථකව මුහුණ දීමට අවශ්‍ය සුරක්ෂිතභාවය, ගැඹුරු අවබෝධය මෙන්ම ස්ථිර ආත්මවිශ්වාසය ද ඔවුන්ට දායාද කිරීම වැඩිහිටි පරපුරේ සහ වගකිවයුතු ආයතනවල මූලික යුතුකම බව ඇය පෙන්වා දෙයි.
ළමුන්ගේ අදහස්වලට සහ හැඟීම්වලට සවන්දීම සමාජීය සංවර්ධනයේ ප්‍රධාන සන්ධිස්ථානයක් ලෙස පෙන්වා දෙන අග්‍රාමාත්‍යවරිය, දරුවන්ගේ සිතුවිලි සහ අත්දැකීම් නිසි අයුරින් අගයමින් ඔවුන්ගේ දක්ෂතාවලට නිදහසේ පිබිදීමට අවකාශය සලසා දෙන ජාතික පසුබිමක් නිර්මාණය කිරීමේ වැදගත්කම යළිත් තහවුරු කරයි. දරුවන්ට එරෙහි සියලු ආකාරයේ ආර්ථික හා සමාජීය අපයෝජන මෙන්ම අසාධාරණතා වැළැක්වීම සඳහා රජය විසින් මෑතකදී ගෙන යන ලද දැඩි නීතිමය සංශෝධන සහ ආරක්ෂණ විධිවිධාන හරහා මෙරට දරු පරපුරේ අයිතිවාසිකම් සහ සුරක්ෂිතභාවය අඛණ්ඩව තහවුරු කෙරෙමින් පවතින බවද මෙහිදී අනාවරණය වේ.
ඉදිරියේදී ශ්‍රී ලංකාවේ අධ්‍යාපන හා සමාජ සුභසාධන ප්‍රතිපත්ති වඩාත් ළමා හිතකාමී රාමුවක් තුළ සංවර්ධනය කිරීමට අපේක්ෂිත අතර, අභිමානයෙන් ලොව ජය ගන්නා බුද්ධිමත් හා සවිමත් මනසක් පරපුරක් බිහි කිරීම සඳහා රජය ගෙන යන වැඩපිළිවෙළට සමස්ත සමාජයේම සක්‍රීය දායකත්වය අත්‍යවශ්‍ය වේ. අනාගත ලෝකයේ අභියෝග ජයගනිමින් රටට අභිමානයක් ගෙනෙන පුරවැසියන් ලෙස නැගී සිටීමට මෙරට සෑම දරුවෙකුටම සමාන අවස්ථා සහ සුරක්ෂිත පරිසරයක් උරුම කර දීම වෙනුවෙන් රජය ප්‍රමුඛත්වයෙන් පෙනී සිටින බව මෙම ලෝක ළමා දින සැමරුම ඔස්සේ තවදුරටත් තහවුරු කෙරේ.
