සයිබර් අපරාධකරුවන් විසින් මුදල් අමාත්යාංශයෙන් අත්පත් කරගත් අමෙරිකානු ඩොලර් මිලියන 2.5ක මුදල සම්බන්ධයෙන් පුළුල් විමර්ශන ආරම්භ කර ඇති බව අග්රාමාත්ය ආචාර්ය හරිනි අමරසූරිය මහත්මිය අද (24) ප්රකාශ කළාය. අග්රාමාත්යවරිය දැක්වූ අදහස්වල සාරාංශය පහත පරිදි වේ.
මුදල් අමාත්යාංශයේ මුදල් අස්ථානගත වීම සම්බන්ධයෙන් දැනටමත් පරීක්ෂණ ක්රියාත්මක වන අතර, මේ සඳහා ජාත්යන්තර සහාය ද මෙරටට ලැබී ඇති බව ඇය සඳහන් කළාය. මෙයට සම්බන්ධ පුද්ගලයින්ට එරෙහිව දැඩිව නීතිය ක්රියාත්මක කිරීමට රජය පියවර ගන්නා බව ද ඇය අවධාරණය කළාය.
විපක්ෂය විසින් තමාට එරෙහිව ගෙන ඒමට සූදානම් වන විශ්වාසභංග යෝජනාව පිළිබඳව අදහස් දක්වමින් අග්රාමාත්යවරිය පැවසුවේ තමා ඒ දෙස බලා සිටින බවයි. එය පාර්ලිමේන්තුවට ඉදිරිපත් වූ පසු තමාට එල්ල වන චෝදනාවලට පිළිතුරු දීමට අවස්ථාව ලැබෙන බව ඇය වැඩිදුරටත් සඳහන් කළාය.
ප්රජාතන්ත්රවාදී රටකට විපක්ෂයක් අත්යවශ්ය බවත්, ආණ්ඩුවේ වැරදි පෙන්වා දීම විපක්ෂයක වගකීම බවත් ඇය පෙන්වා දුන්නාය. කෙසේ වෙතත්, වත්මන් විපක්ෂය සිදු කරන්නේ එම වගකීම ද යන්න පිළිබඳව ජනතාවට සිතා බැලීමට සිදුවන බව ද ඇය පැවසුවාය.
අග්රාමාත්යවරිය මෙම අදහස් පළ කළේ අද පෙරවරුවේ මහනුවර වල්වතු මහා විහාර පරිශ්රයේ පැවැති වැඩසටහනකින් අනතුරුව මාධ්ය වෙත අදහස් දක්වමිනි.
