පවතින කලාපීය අර්බුදය සමනය කර ස්ථාවර සාමයක් ඇති කිරීමේ අරමුණින්, කටාර් රාජ්යයේ අග්රාමාත්ය මෙන්ම විදේශ අමාත්යවරයා ද වන ෂෙයික් මොහොමඩ් බින් අබ්දුල්රහ්මාන් අල් තානි (Mohammed bin Abdulrahman Al Thani) මහතා ඉරාන විදේශ අමාත්ය අබ්බාස් අරාග්චි (Abbas Araghchi) මහතා සමඟ විශේෂ දුරකථන සංවාදයක නිරත වී තිබේ. කටාර් විදේශ අමාත්යාංශය නිල නිවේදනයක් නිකුත් කරමින් සඳහන් කරන්නේ කලාපීය අර්බුදය නිමා කිරීම සඳහා දැනට ක්රියාත්මක වන මැදිහත් වීමේ උත්සාහයන් සඳහා දෝහා (Doha) නුවර පූර්ණ සහයෝගය ලබා දෙන බව අග්රාමාත්යවරයා මෙහිදී යළිත් තහවුරු කළ බවයි.
මෙම සාකච්ඡාවේදී කටාර් අග්රාමාත්යවරයා අවධාරණය කළේ කලාපයේ තිරසාර සාමය සහ ස්ථාවරත්වය ළඟා කර ගැනීම සඳහා සියලුම පාර්ශවයන් වත්මන් මැදිහත්කරුවන්ට ධනාත්මක ප්රතිචාර දැක්විය යුතු බවයි. විශේෂයෙන්ම ගෝලීය වෙළෙඳාමට අතිශය තීරණාත්මක වන ‘හෝමුස් සමුද්ර සන්ධිය’ (Strait of Hormuz) වසා දැමීම හෝ එය දේශපාලන කටයුතු සඳහා බලපෑම් සහගත මෙවලමක් (Bargaining Chip) ලෙස භාවිත කිරීම මඟින් සිදුවන්නේ වත්මන් අර්බුදය තවදුරටත් උග්ර වීම සහ කලාපීය රටවල වැදගත් අවශ්යතා අනතුරේ වැටීම පමණක් බව ඔහු පෙන්වා දුන්නේය. “මුහුදේ යාත්රා කිරීමේ නිදහස” (Freedom of Navigation) යනු කිසිසේත්ම සාකච්ඡාවට ලක් කළ නොහැකි, අනිවාර්යයෙන්ම සුරැකිය යුතු මූලික ප්රතිපත්තියක් බව ද ඔහු සඳහන් කළේය.
ජාත්යන්තර නීති රීති මෙන්ම අසල්වැසි රටවල් අතර පැවතිය යුතු යහපත් සබඳතාවල ප්රතිපත්තිවලට ගරු කරමින්, සමස්ත කලාපයේ සහ එහි ජනතාවගේ යහපත උදෙසා කටයුතු කිරීමටත්, පවතින නොසන්සුන්කාරී තත්ත්වයන් වහාම සමනය කිරීමට (De-escalation) පියවර ගන්නා ලෙසත් කටාර් අග්රාමාත්යවරයා මෙහිදී ඉරානය ඇතුළු සියලුම පාර්ශවයන්ගෙන් ඉල්ලා සිටියේය.
