ශ්රී ලංකා දුම්රිය සේවය දැඩි අර්බුදයකට ලක් කරමින්, තාක්ෂණික දෝෂ සහිත දුම්රිය ධාවනයෙන් ඉවත් වීමටත් වේග සීමා නීති තරයේ පිළිපැදීමටත් ලොකොමෝටිව් දුම්රිය රියදුරන්ගේ සංගමය තීරණය කර තිබේ. මෙම තත්ත්වය හේතුවෙන් ඉදිරි දිනවලදී දුම්රිය ගමන් වාර රැසක් ප්රමාද වීමට හෝ අවලංගු වීමට ඉඩ පවතින බව එම සංගමය අනතුරු අඟවයි.
මෙම වෘත්තීය ක්රියාමාර්ගයට හේතු වූ ප්රධාන කරුණු කිහිපයක් මෙසේය.
සාගරිකා දුම්රිය අනතුර සහ නිලධාරීන් වැඩ තහනම
පසුගියදා බෙලිඅත්තේ සිට මරදාන බලා ධාවනය වූ “සාගරිකා” දුම්රිය පීලි පැනීමට ලක්වීමේ සිද්ධිය සම්බන්ධයෙන් විමර්ශන අවසන් වන තෙක් එහි රියදුරු ඇතුළු කාර්ය මණ්ඩලය සේවයෙන් ඉවත් කිරීමට දුම්රිය දෙපාර්තමේන්තුව පියවර ගෙන ඇත. බලධාරීන්ගේ සහ යටිතල පහසුකම්වල පවතින අඩුපාඩු වසා ගැනීමට සේවකයන් බිල්ලට දීමක් ලෙස මෙය හඳුන්වන වෘත්තීය සමිති, ඊට විරෝධය පළ කරමින් මෙම තීරණය ගෙන තිබේ.
දුම්රිය එන්ජින්වල පවතින අබලන් තත්ත්වය
සමස්ත දුම්රිය එන්ජින් සංඛ්යාවෙන් 80%ක්ම විවිධ තාක්ෂණික දෝෂවලින් යුක්ත බව ලොකොමෝටිව් දුම්රිය රියදුරන්ගේ සංගමයේ සභාපති ජීව ගුණවර්ධන මහතා පවසයි. ඇතැම් දුම්රියවල වේග සීමා මීටර් පවා ක්රියා විරහිත වී ඇති අතර, එවැනි අනාරක්ෂිත තත්ත්වයන් මධ්යයේ වුවද මෙතෙක් කාලසටහනට අනුව ධාවනය කිරීමට රියදුරන් අවදානමක් ගත් බව ඔහු පෙන්වා දෙයි.
යටිතල පහසුකම් කඩාවැටීම
දුම්රිය මාර්ග නිසි පරිදි නඩත්තු නොකිරීම, අමතර කොටස් හිඟය සහ සංඥා පද්ධතිවල පවතින දෝෂ හේතුවෙන් දුම්රිය ධාවනය දැඩි අවදානමකට ලක්ව ඇති බව ස්වාධීන වෘත්තීය සමිති ඒකමුතුව පවසයි. මින් ඉදිරියට නියමිත වේග සීමා නීති අකුරටම ඉටු කරන බැවින් දුම්රිය ප්රමාද වීම් අනිවාර්යයෙන්ම සිදුවන බව ද ඔවුන් සඳහන් කරයි.
නඩත්තු කටයුතු සිදු කිරීමට දුම්රිය දෙපාර්තමේන්තුවට යම් කාලයක් ලබා දෙන අතර, එම කාලය තුළ ප්රගතියක් නොපෙන්වන්නේ නම් දෝෂ සහිත සියලු එන්ජින් ධාවනය කිරීම ප්රතික්ෂේප කරන බව වෘත්තීය සමිති වැඩිදුරටත් අවධාරණය කර සිටියි.
