දිවයින පුරා පවතින දැඩි වර්ෂාපතනය හේතුවෙන් අධිවේගී මාර්ගවල ගමන් ගන්නා රථවාහන රියදුරන්ට උපරිම අවධානයෙන් හා ප්රවේශමෙන් කටයුතු කරන ලෙස මාර්ග සංවර්ධන අධිකාරිය (RDA) විශේෂ උපදෙස් මාලාවක් නිකුත් කරමින් දන්වා සිටියි. විශේෂයෙන්ම අධිවේගී මාර්ග දෙපස සවිකර ඇති විද්යුත් පුවරු මඟින් නිකුත් කරන අනතුරු ඇඟවීම් සහ උපදෙස් පිළිබඳව නිරන්තරයෙන් සැලකිලිමත් වන ලෙස රියදුරන්ගෙන් ඉල්ලා සිටින අතර අයහපත් කාලගුණය හේතුවෙන් මාර්ගයේ පෙනීම සීමා විය හැකි බැවින් ගමන් ගන්නා සෑම අවස්ථාවකදීම වාහනවල ප්රධාන ලාම්පු (Headlights) දල්වා තබා ගැනීමට පියවර ගන්නා ලෙසද දැනුම් දෙයි.
තවද, ලිස්සා යාමේ අවදානම අවම කරගැනීම සඳහා වාහනයේ වේගය පැයට කිලෝමීටර් 60 සීමාවට වඩා අඩුවෙන් පවත්වා ගත යුතු අතර ඉදිරියෙන් ධාවනය වන වාහන අතර ආරක්ෂිත පරතරයක් තබා ගැනීම අනිවාර්ය වේ. මාර්ග මතුපිට තෙත් ස්වභාවයක් ගැනීම නිසා ක්ෂණිකව තිරිංග තද කිරීමේදී වාහන ලිස්සා යාමේ දැඩි ප්රවණතාවක් පවතින බව පෙන්වා දෙන මාර්ග සංවර්ධන අධිකාරිය, අධිවේගී මාර්ග පරිශීලනය කරන සියලුම පාර්ශවයන් කාලගුණ තත්ත්වය පිළිබඳව අවබෝධයෙන් යුතුව ඉතා ඉවසීමෙන් සහ වගකීමෙන් යුතුව රිය පදවන ලෙස තවදුරටත් අවධාරණය කරයි.
