කුරුණෑගල දිස්ත්රික්කයේ රිදීගම පිහිටි ඓතිහාසික රිදී විහාරය, දුටුගැමුණු රජ සමයේ රුවන්වැලි මහා සෑය නිම කිරීමට අවශ්ය රිදී නිධානය පහළ වූ පින්බිම ලෙස ශාසන ඉතිහාසයේ රන් අකුරින් ලියැවී ඇත. වර්තමානයේ මෙම විහාරස්ථානය ආගමික වතාවත්වලට පමණක් සීමා නොවී, තිබ්බටුවාවේ ශ්රී සිද්ධාර්ථ බුද්ධරක්ඛිත නායක හිමියන්ගේ මඟපෙන්වීම යටතේ සුවිශාල සමාජ මෙහෙවරක නිරත වෙයි.
රිදී විහාරයේ වැඩ සිටින ‘රන් බුද්ධ ප්රතිමා වහන්සේ’ දක්ෂිණ භාරතයේ මධුරාපුරයෙන් වැඩමවා ඇති බව ඉතිහාසයේ සඳහන් වේ. මෙම විහාරස්ථානය තුළ බෞද්ධ සහ හින්දු කලා ශිල්පවලට අමතරව, ඕලන්ද ආණ්ඩුකාරවරයෙකු පූජා කළ ක්රිස්තු චරිතය දැක්වෙන පිඟන් ගඩොල් ද දැකගත හැකිය. මෙය රිදී විහාරය තුළ පවතින විවෘත ආගමික සහජීවනයට කදිම නිදසුනකි. මහනුවර පෙරහැරෙන් පසුව වැඩිම අලි ඇතුන් සංඛ්යාවක් සහභාගී වන පෙරහැරක් ලෙස රිදී විහාර පෙරහැර ප්රකටය.
‘රිදී සෙත’ අරමුදල හරහා විහාරස්ථානය මගින් වාර්ෂිකව පාසල් දරුවන්ට උපකරණ බෙදාදීම, නිවාස අහිමි පවුල්වලට ඉඩම් සහ නව නිවාස ලබාදීම වැනි පුළුල් සුබසාධන කටයුතු රැසක් සිදු කෙරේ. දිට්වා සුළි කුණාටුවෙන් අවතැන් වූ පවුල්වලට ඉඩම් අක්කර 5ක් බෙදා දීම හා රිදීගම රෝහලේ භික්ෂු වාට්ටුව නඩත්තු කිරීම ඒ අතර විශේෂ වේ. මෙම සේවාවන් ජාති, ආගම් භේදයකින් තොරව සියලු දෙනා වෙනුවෙන් විවෘතව පවතී.
විදේශීය සංචාරකයන් සඳහා ‘බෞද්ධ සංචරණය’ ව්යාපෘතිය යටතේ නොමිලේ නවාතැන් හා ආහාරපාන පහසුකම් සපයනු ලැබේ. භාවනා කිරීමට කැමති විදේශිකයන් වෙනුවෙන් විහාර භූමියේ ඇති ගල් ලෙන් 64ක් නවීකරණය කර ඇති අතර, ඉංග්රීසි භාෂාවෙන් ධර්ම දේශනා සහ භාවනා වැඩසටහන් මෙහෙයවීමට ද පහසුකම් සලසා ඇත. රිදී විහාර භාරකාර තිබ්බටුවාවේ ශ්රී සිද්ධාර්ථ බුද්ධරක්ඛිත නායක හිමියන්ගේ 50 වැනි ජන්ම දිනය පසුගිය අප්රේල් 18 වැනිදාට යෙදී තිබූ අතර, ඒ වෙනුවෙන් විහාරස්ථ දායක සභාව විවිධ පින්කම් සංවිධානය කර තිබිණි.
