යුක්රේනයට ප්රහාරක ඩ්රෝන යානා සහ ඒවායේ උපාංග සපයන බවට සැක කෙරෙන යුරෝපීය සමාගම් සහ ඒවායේ ලිපින ඇතුළත් ලැයිස්තුවක් රුසියානු ආරක්ෂක අමාත්යාංශය විසින් ප්රසිද්ධ කර තිබේ. රුසියාව පවසන්නේ මෙම සමාගම් රුසියානු හමුදාවල “විභව යුද ඉලක්ක” (Potential military targets) බවයි.
රුසියාව විසින් රටවල් 11කට අයත් සමාගම් ලැයිස්තුගත කර ඇත. මීට එක්සත් රාජධානිය, ජර්මනිය, නෙදර්ලන්තය, ඩෙන්මාර්කය, ලැට්වියාව, ලිතුවේනියාව, පෝලන්තය, චෙක් ජනරජය, ස්පාඤ්ඤය, ඉතාලිය සහ තුර්කියට අමතරව ඊශ්රායලයේ සමාගම් ද ඇතුළත් වේ. ලන්ඩන්, මියුනිච්, රීගා, විල්නියස් සහ ප්රාග් වැනි නගරවල පිහිටි ආයතන 11ක් සහ ස්පාඤ්ඤයේ මැඩ්රිඩ්, ඉතාලියේ වැනිස් සහ ඊශ්රායලයේ හයිෆා හි පිහිටි උපාංග නිෂ්පාදන ආයතන 10ක් රුසියානු ලැයිස්තුවට ඇතුළත් කර තිබේ.
යුරෝපීය රටවල් සිය භූමිය තුළ යුක්රේනය සමඟ එක්ව ඩ්රෝන යානා නිෂ්පාදනය කිරීම සහ ඒවාට අරමුදල් සැපයීම යුද්ධය තවදුරටත් උත්සන්න කිරීමක් (Escalation) ලෙස රුසියාව හඳුන්වයි. මෙමඟින් යුරෝපීය රටවල් සෘජුවම යුද්ධයට ඇදී යන බවත්, ඔවුන් යුක්රේනයේ “මූලෝපායික පසුපස කලාපය” (Strategic rear) බවට පත්වන බවත් රුසියාව අවධාරණය කරයි.
රුසියාවේ හිටපු ජනාධිපති සහ වත්මන් ආරක්ෂක කවුන්සිලයේ නියෝජ්ය ප්රධානී දිමිත්රි මෙඩ්විඩෙව් (Dmitry Medvedev) පවසා ඇත්තේ මෙම ලැයිස්තුව “අකුරටම පිළිගත යුතු” එකක් බවත්, ප්රහාර එල්ල කිරීමේ තීරණය ඉදිරි තත්ත්වයන් මත තීරණය වන බවත්ය.
ජර්මනිය විසින් යුක්රේනයට යුරෝ බිලියන 4ක නව ආරක්ෂක පැකේජයක් ප්රකාශයට පත් කිරීම සහ යුක්රේන ජනාධිපති සෙලෙන්ස්කි ඉතාලිය සමඟ ඩ්රෝන නිෂ්පාදන ගිවිසුමක් සඳහා සාකච්ඡා කිරීමෙන් අනතුරුව රුසියාව මෙම පියවර ගෙන ඇත.
කෙසේ වෙතත්, රුසියාව විසින් ප්රසිද්ධ කරන ලද ඇතැම් ලිපින වැරදි බවත්, උදාහරණයක් ලෙස මියුනිච් හි එක් ලිපිනයක් නිකම්ම නේවාසික ගොඩනැගිල්ලක් පමණක් බවත් විදෙස් මාධ්ය වාර්තා පෙන්වා දෙයි.
