යුරෝපා සංගමය සමඟ ආර්මේනියාව සබඳතා වර්ධනය කරගැනීමට ගෙන ඇති පියවරයන්ට විරෝධය පළ කරමින්, එරට සිටින රුසියානු තානාපති සර්ජි කොපිරකින් (Sergei Kopyrkin) මහතා උපදෙස් ලබා ගැනීම සඳහා මොස්කව් වෙත කැඳවීමට රුසියානු විදේශ අමාත්යාංශය පියවර ගෙන තිබේ.
ජුනි 07 වැනි දින පැවැත්වීමට නියමිත මැතිවරණයට පෙර මෙම සිදුවීම වාර්තා වීම විශේෂත්වයකි. රුසියාවේ මිත්ර රටක් ලෙස සැලකෙන මිලියන 3ක ජනගහනයක් වෙසෙන ආර්මේනියාව, රුසියාව මත ආර්ථික වශයෙන් යැපුණ ද මෑත වසරවලදී බටහිර රටවල් සමඟ සබඳතා ශක්තිමත් කරගැනීමට වැඩි උනන්දුවක් දක්වමින් සිටී.
මෙම තත්ත්වය සම්බන්ධයෙන් අදහස් දක්වමින් රුසියානු විදේශ අමාත්යාංශය සඳහන් කළේ, ආර්මේනියානු නායකත්වය යුරෝපා සංගමය සමඟ සමීප වීමට ගෙන ඇති පියවරයන් හේතුවෙන් මෙම තීරණය ගත් බවයි. මීට අමතරව, ආර්මේනියාව යුරෝපා සංගමයේ සාමාජිකත්වය ලබා ගැනීමට උත්සාහ කිරීම සම්බන්ධයෙන් රුසියාව ප්රමුඛ ආර්ථික සංගමයක් විසින් ආර්මේනියාවේ සාමාජිකත්වය අත්හිටුවීම පිළිබඳව සලකා බැලීමට ඉඩ ඇති බවටත්, ඒ පිළිබඳව ජනමත විචාරණයක් පවත්වන ලෙස යෙරෙවන් වෙත දැනුම් දී ඇති බවටත් වාර්තා වේ.
පවතින මත විමසුම්වලට අනුව, බටහිර හිතවාදී අග්රාමාත්ය නිකොල් පාෂින්යන් (Nikol Pashinyan) ගේ පක්ෂය රුසියානු හිතවාදී විපක්ෂයට වඩා ඉදිරියෙන් පවතී. අසර්බයිජානය සමඟ පැවති ගැටුම්වලදී රුසියාව විසින් ආර්මේනියාව ආරක්ෂා කිරීමට අපොහොසත් වූ බවට පාෂින්යන් රජය චෝදනා කරයි. 2023 වසරේදී අසර්බයිජානය විසින් නාගෝර්නෝ-කරබාක් කලාපය නැවත සිය පාලනයට නතු කර ගැනීමෙන් පසු මෙම අර්බුදය උග්ර විය.
