පෞද්ගලික ආයතනයක මුදල් වංචාවක් නිසා අසරණ වූ ජනතාව පෙරේදා (17) හමු වූ අවස්ථාවකදී අදහස් දක්වමින් විපක්ෂ නායක සජිත් ප්රේමදාස මහතා ප්රකාශ කළේ, සමගි ජන බලවේගය බලයේ සිටියා නම් ලෝක වෙළෙඳපොළේ බොරතෙල් මිල ඉහළ යන විට තෙල් මිල වැඩි කළා සේම, මිල අඩු වන විටදී ජනතාවට සහන දෙමින් අනිවාර්යයෙන්ම තෙල් මිල අඩු කරන බවයි. මැදපෙරදිග යුද්ධය නිසා බොරතෙල් මිල ඉහළ ගිය බව පවසමින් මෙරට තෙල් මිල වැඩි කළ වත්මන් රජය, මේ වන විට ලෝක වෙළෙඳපොළේ බොරතෙල් මිල පහළ ගොස් තිබියදීත් මෙරට මිල අඩු කිරීමට කටයුතු නොකිරීම බරපතළ වරදක් බව ද ඒ මහතා පෙන්වා දුන්නා.
වත්මන් රජය බලයට පැමිණියේ තෙල් සඳහා පවතින ඉහළ බදු ඉවත් කර වරායේ ගොඩබාන මිලටම තෙල් දෙනවා යැයි පවසමින් වුවත්, අද වන විට ලෝක වෙළෙඳපොළේ මිල අඩු වන අවස්ථාවක පවා එහි වාසිය ජනතාවට දීමට රජය අපොහොසත් වී ඇති බවයි විපක්ෂ නායකවරයා සඳහන් කළේ. ඉරානය සහ අමෙරිකාව පවා මේ වන විට සාම සාකච්ඡා සඳහා සූදානම් වෙමින් තෙල් මිල පහළ ගොස් ඇති මොහොතක, රජය ලංකාවේ ලක්ෂ 220ක් වන සමස්ත ජනතාව මෝඩයන් සේ සලකමින් සහ තමන්ගේ පදයට නටනු ඇතැයි සිතමින් බොරුව, වංචාව සහ මුසාව පමණක් ක්රියාත්මක කරන බවට ද ඔහු චෝදනා කළා. මේ හේතුවෙන් ජනතාව රජය මෙන්ම දේශපාලනඥයන් කෙරෙහි ද බරපතළ අවිශ්වාසයකින් පසුවන බවත්, සමගි ජන බලවේගයේ මහජන නියෝජිතයන් කිසිසේත්ම මුදලට අලෙවි නොවී ජනතාවගේ දුක වෙනුවෙන් පමණක් පෙනී සිටින බැවින්, වහාම ක්රියාත්මක වන පරිදි මෙරට තෙල් මිල අඩු කළ යුතු බවට තම පක්ෂය දැඩිව බලකර සිටින බවත් සජිත් ප්රේමදාස මහතා වැඩිදුරටත් අවධාරණය කළා.
