ජනාධිපතිවරණ සමයේදී ජනතාව රැවැට්ටූ පිරිසක් අද රට පාලනය කරන බවත්, තමා කිසි දිනක ජනතාව අන්දවා නොමැති බවත් විපක්ෂ නායක සජිත් ප්රේමදාස මහතා පවසයි. සංවර්ධන නිලධාරීන් සමඟ පෙරේදා (16) පැවැති සාකච්ඡාවකදී ඒ මහතා මේ බව සඳහන් කළේය.
රටේ උගත් බුද්ධිමත් පිරිසක් වන සංවර්ධන නිලධාරීන් සහ ආර්ථික සංවර්ධන නිලධාරීන් වෙනුවෙන් තමා පාර්ලිමේන්තුවේ නිරන්තරයෙන් හඬ නඟන බවත්, ඔවුන් සඳහා තවමත් නිසි සේවා ව්යවස්ථාවක්, සමාන වැටුප් තලයක් හෝ උසස්වීම් ක්රමවේදයක් නොමැති වීම විශාල අසාධාරණයක් බවත් පැවසීය. උපාධියට සරිලන තනතුරු නොමැති වීම සහ අඩු සුදුසුකම් සහිත පිරිස්වල අධීක්ෂණය යටතේ සේවය කිරීමට සිදුවීම වැනි ගැටලු පවතින බව ඔහු පෙන්වා දුන්නේය.
ජනාධිපතිවරණ සමයේදී ජනතාවට සහ විවිධ වෘත්තීය කණ්ඩායම්වලට බොරු පොරොන්දු ලබා දෙමින් ඔවුන් මුළා කළ බවත්, අද වන විට එම පිරිස් ආණ්ඩුව විසින් වින්දිතයන් බවට පත් කර ඇති බවත් ඔහු චෝදනා කරයි. මැතිවරණ සමයේ තමා සත්යය පැවසුවත්, බොහෝ දෙනෙකු එය නොපිළිගත් බවත්, මේ වන විට ආණ්ඩුවට සහය දුන් පිරිස් පවා වෘත්තීයවේදීන්ව අමතක කර ඇති බවත් ඔහු සඳහන් කළේය.
වැඩිහිටි සහ විශ්රාමිකයන්ගේ ඉතුරුම් සඳහා ලබා දුන් පොලී ප්රතිලාභ අහිමි කිරීම, ගොවීන්ගේ පොහොර සහ බීජ සහන මිල නතර කිරීම සහ ධීවර ප්රජාවට ලබා දුන් සහන කප්පාදු කිරීම හේතුවෙන් ජනතාව අන්ත අසරණ වී ඇති බව ප්රේමදාස මහතා අවධාරණය කළේය. එසේම, මසකට රුපියල් 17,000ක මුදලකින් දින 30ක් ජීවත් විය හැකිය යන්න හාස්යජනක ප්රකාශයක් බවත්, එම තත්ත්වය පිළිබඳව නැවත සිතා බැලිය යුතු බවත් ඔහු පැවසීය.
සමගි ජන බලවේගය මෙම අසාධාරණයන්ට එරෙහිව පෙනී සිටින බවත්, ඉදිරි සතියේදී පාර්ලිමේන්තුවේදී මේ පිළිබඳව විශේෂ අවධානයක් යොමු කරන බවත් විපක්ෂ නායකවරයා වැඩිදුරටත් කියා සිටියේය.
