වත්මන් රජය විපක්ෂයේ සිටියදී ජනතාව වෙනුවෙන් හෙළූ කඳුළු කිඹුල් කඳුළු බවට පත්ව ඇති බවත්, ගොවියා රජකරවන බවට පොරොන්දු වී බලයට පැමිණි පිරිස අද වන විට ගොවි ජනතාව සම්පූර්ණයෙන්ම අසරණ කර ඇති බවත් විපක්ෂ නායක සජිත් ප්රේමදාස මහතා පවසයි. අද (20) විපක්ෂ නායක කාර්යාලයේදී CIFL මූල්ය ආයතනයේ තැන්පත්කරුවන් පිරිසක් හමුවූ අවස්ථාවේදී ඔහු මේ බව සඳහන් කළේය.
විපක්ෂ නායකවරයා පෙන්වා දුන් පරිදි, බීජ හා පොහොර හිඟය, කෘෂි රසායනික ද්රව්යවල අධික මිල, අලි-මිනිස් ගැටුම සහ අස්වැන්නට සාධාරණ මිලක් නොමැති වීම නිසා ගොවීන් අද දැඩි පීඩනයකට ලක්ව සිටී. විපක්ෂයේ සිටියදී වී කිලෝවකට රු. 150ක ස්ථාවර මිලක් ලබා දෙන බව පැවසුවද, අද අම්පාර වැනි ප්රදේශවල වී කිලෝවක් අලෙවි වන්නේ රු. 70 – 80 වැනි ඉතා අඩු මිලකට බව ඔහු පෙන්වා දෙයි.
රු. 10,200ට පොහොර ලබා දෙන බව රජය පැවසුවද ප්රායෝගිකව රට පුරා පොහොර හිඟයක් පවතින බවත්, අතීතයේ ‘අසුචි පොහොර’ ලබා දී ගොවියා විනාශ කළ පරිදිම අදටත් ගුණාත්මක පොහොර නොමැති වීම නිසා ගොවිතැන කඩා වැටී ඇති බවත් ඔහු චෝදනා කළේය. එසේම ජීවන වියදම ඉහළ යාම සහ ආදායම් මාර්ග බිඳ වැටීම නිසා ජනතාව මන්දපෝෂණයෙන් පෙළෙන තත්ත්වයට පත්ව ඇති බවත්, පාසල් අධ්යාපනය පවා කඩා වැටී ඇති බවත් ඔහු අවධාරණය කළේය.
අවසාන වශයෙන්, ගොවීන් වෙනුවෙන් වී කිලෝවකට අවම වශයෙන් රු. 120ක ස්ථාවර මිලක් ලැබෙන තෙක් සහ ඔවුන්ගේ ගැටලු විසඳන තෙක් තමන් ප්රමුඛ සමගි ජන බලවේගය දිගින් දිගටම පෙනී සිටින බව විපක්ෂ නායකවරයා වැඩිදුරටත් කියා සිටියේය.
