ශුද්ධ වූ මුහම්මද් නබිතුමන්ගේ ජන්ම දින සැමරුම හෙවත් මිලාද්-උන්-නබි උත්සවය වෙනුවෙන් විපක්ෂ නායක සජිත් ප්රේමදාස මහතා විශේෂ සුබපැතුම් පණිවුඩයක් නිකුත් කරමින් ජාතික සහජීවනය සහ මානවීය බැඳීම් තවදුරටත් ශක්තිමත් කරගැනීමේ අවශ්යතාව දැඩිව අවධාරණය කර තිබේ. මනුෂ්යත්වය ඉදිරියේ කිසිදු ජාති, ආගම් හෝ වෙනත් භේදයකට වඩා ගෞරවය, සාධාරණත්වය, කරුණාව සහ සහෝදරත්වය මුල්තැන ගත යුතු බව හෙතෙම පෙන්වා දී ඇත.
විවිධත්වය යනු කිසිදු විටෙක බෙදී වෙන්වීමට හේතුවක් කර නොගත යුතු අතර, එය ශ්රී ලංකාවේ සැබෑ ශක්තිය බවට පත් කරගත යුතු බව විපක්ෂ නායකවරයා එම පණිවිඩය මඟින් පෙන්වා දී තිබේ. වෙනස්කම් සහජයෙන්ම පිළිගනිමින්, අනෙකාගේ අයිතිවාසිකම් හා විශ්වාසයන්ට ගරු කරමින් කිසිදු ජන කොටසක් සමාජයෙන් අතහැර නොදමන සාධාරණ සමාජයක් ගොඩනැගීම සමස්ත පුරවැසියන්ගේම පොදු වගකීමක් බවද එහි සඳහන් වේ.
මුහම්මද් නබිනායකතුමා විසින් එදා පෙන්වා දුන් සාමයේ, සාධාරණත්වයේ සහ සහජීවනයේ මග වත්මන් ශ්රී ලංකාවට නව ආලෝකයක් වනු ඇතැයි අපේක්ෂා කරන බව හෙතෙම පවසා ඇත. මෙරට සමස්ත ඉස්ලාම් බැතිමතුන් වෙත පින්බර මිලාදුන් නබි දිනයක් ප්රාර්ථනා කරමින් විපක්ෂ නායකවරයා නිකුත් කළ මෙම පණිවිඩය තුළින් ජාතික එකමුතුභාවය සහ අන්යෝන්ය අවබෝධය වර්ධනය කරගැනීමේ කාලීන අවශ්යතාව මනාව ඉස්මතු කරනු ලබයි.
