රටේ බිම් මට්ටමේ සංවර්ධන හා ජනතා සුබසාධන වැඩසටහන් ක්රියාත්මක කිරීමෙහිලා අත්යවශ්ය මූලික කුළුණක් වන ග්රාම නිලධාරී සේවය මුහුණ දී ඇති දැඩි වෘත්තීය හා ආර්ථික අර්බුද හමුවේ, ඔවුන්ගේ සේවය කිසිදු ලෙසකින් හෝ හෑල්ලුවට ලක් නොකර අයිතිවාසිකම් ලබා දෙන ලෙස විපක්ෂ නායක සජිත් ප්රේමදාස මහතා රජයෙන් දැඩි ලෙස ඉල්ලා සිටියි. විපක්ෂ නායක කාර්යාලයේදී ග්රාම නිලධාරීන්ගේ ගැටලු සාකච්ඡා කිරීම සඳහා පැවති විශේෂ හමුවකදී ඒ මහතා මෙම අදහස් පළ කළ අතර, පදිංචි සහතික නිකුත් කිරීමේ සිට සංකීර්ණ සමාජ සුබසාධන ක්රියාවලීන් දක්වා පුළුල් පරාසයක රාජකාරීභාරයක් ඉටු කරන මෙම නිලධාරීන් පිරිස මේ වන විටත් මූලික පහසුකම් පවා නොමැතිව දැඩි දුෂ්කරතාවන්ට මුහුණ දී සිටින බව පෙන්වා දුන්නේය.
ජන ජීවිතය නගාලීමේ සහ රාජ්ය යාන්ත්රණය ගම් මට්ටමින් ක්රියාත්මක කිරීමේ ප්රධාන වගකීමක් උසුලන ග්රාම නිලධාරීන්ට මෙතෙක් නිසි පරිදි ඉන්ධන දීමනාවක් මෙන්ම සන්නිවේදන හා අවදානම් දීමනා හිමි වී නොමැති වීම පරිපාලනමය අසාධාරණයක් බව මෙහිදී අවධාරණය කෙරිණි. දිනෙන් දින ඉහළ යන ජීවන වියදම සහ ක්ෂේත්ර රාජකාරී සඳහා දැරීමට සිදුවන අධික ප්රවාහන වියදම් හමුවේ මෙම දීමනා නොමැතිකම ඔවුන්ගේ දෛනික වෘත්තීය කටයුතුවලට දැඩි බාධාවක්වී ඇති අතර, රාජ්ය සේවයේ කොඳු නාරටිය බඳු මෙම ක්ෂේත්රය අමතක කර ජාතික සංවර්ධනය සාක්ෂාත් කරගත නොහැකි බවට විපක්ෂ නායකවරයා දැඩි ස්ථාවරයක පිහිටමින් පෙන්වා දුන්නේය.
ඉදිරියේදී මෙම ගැටලු සඳහා බලධාරීන් විසින් ප්රායෝගික හා කඩිනම් විසඳුම් ලබා නොදුනහොත්, එය සමස්ත ග්රාමීය පරිපාලන පද්ධතියේම ක්රියාකාරීත්වයට දැඩි ලෙස බලපානු ඇති බවට සමාජ හා දේශපාලන ක්ෂේත්රයෙන් අනතුරු ඇඟවීම් නිකුත් වෙමින් පවතී. ග්රාම නිලධාරී සේවය මුහුණ දී ඇති මෙම අර්බුදයට කඩිනමින් වගකිවයුතු රාජ්ය මැදිහත්වීමක් සිදු නොවුනහොත්, රාජ්ය සේවක අසතුට තවදුරටත් උග්ර වී ජනතා සේවාවන් අඩාල වීමේ අවදානමක් පවතින බැවින්, අදාළ බලධාරීන් වහාම ක්රියාත්මක වී මෙම දීමනා ලබා දීමට පියවර ගැනීම අත්යවශ්ය කරුණක් බවට පත්ව තිබේ.
